RIHA - Emîne û Ferît Şenyaşar yê ke 193 rojî yo Nobeta xo ya "Edaletî" dewam kenê serê hesabê xo yê medyaya dîjîtalî de vengdayîşê "Ti nêeşkenê edalet bi ca bîyarê o wext îstifa bikere” kerdî. 

 

Çalakîya "Nobeta Edaletî" ya keyeyê Şenyaşarî vernîya Edliyeyê Rihayî de roja 193ine de dewam kena. Saetê serê sibayî de Emîne Şenyaşar û lajê xo Ferît Şenyaşar sey her rojî qezaya Pirsûsî ra ameyî vernîya bînaya edliye û cayê sey "Quncikê Edaletî yê Keyeyê Şenyaşarî" yeno binamekerdiş de bi dowîzê "Ma seba her kesî edalet wazenê” dest bi nobeta xo kerdî.

 

Vengdayîşê ‘îstîfa bikere’ ame kerdiş 

 

Keyeyî serê hesabê xo yê medyaya dîjîtalî de Serdozgerê Komara ya Rihayê Onder Yenîçerî etîket kerd û vat: “Hetêk sencê edaletî de parlementerê îqtîdarî esto. Heto bîn de zî 3 canê ke nêweşxane de ameyî qetilkerdiş estê. Seba ke şima  parlementerêk û keyeyê ey bipawê, heme qanûnan çin hesibnenê. Eke ti nêeşkenê edalet bi ca bîyarê îstîfa bikere.”