DÊRSIM - Platformê Kede û Demokrasî yê Dêrsimî reaksîyon vera tayînkerdişê qeyûmî û destbendkerdişî mojna û wina ame vatiş: "Tayînkerdişê qeyûmî, xesp û derbeyêk îradeyê şarî rê yo. Ganî nê operasyonê bêhuqûqî bêrê peynîkerdiş û tepişteyî serbest bêrê veradayîş.”

 

Platformê Kede û Demokrasî yê Dêrsimî hemverê tayînkerdişê qeyûmî yê Şaredarîya Dêrsimî, rayîrşîyayîşêk protestoyî organîze kerd. Girse vernîya Sûka Binerdî de ame têhet û bi pankartê “Ma wayîrê îradeyê xo vejîyenê û destbendkerdiş, tepiştiş û tedayî nêeşkenê ma bêzar bikerê” berz kerdî û ver bi Şaredarîya Dêrsimî rayîr ra şîyî. Endamê platformî xeylêk rey sloganê, “Ma bi xoverdayîş serkewenê” berz kerdî û tîya eşkerayî dayî.

  

Nameyê platformî ser o Ergîn Tekîn qisey kerd û vat, tayînkerdişê qeyûmî yê Şaredarîya Dêrsimî dewamê hêrişê tarîxî yê Dêrsimî yo. Ergîn Tekîn, bale ant qirkerdişê Dêrsimî ser û vat; eynî hêrişî ewro bi hawayê cîya yenê dewamkerdiş. La pêwa pêro hêriş û tedayan şarê Dêrsimî xo ver dano û do kesêk nêeşko îradeyê şarê Dêrsimî bişikino. Îqtîdarê AKPyî hewl dano ke vînîkerdişê xo yê weçînayîşê 31ê adare bi vilakerdişê muxalefetî û destbendkerdişan binimino.