AMED - Welatijê taxa Peyasî ya Kayapinarî ya Amedî de ciwîyenê, diyar kerdî ke qeyûm wezîfeyê xo bi ca nêano, problemê derûdorî û asayîşî zêde bîyê.

 

Dimayê ke hemşardarê HDPyî yê Amed û qezayê ci wezîfe ra ameyî girewtiş û qeyûm tayînê vera înan ame kerdiş, problemê derûdorî zî zêde bî û bi taybetî zî demê peyîn de problemê sey xebitnayîşê tiryakî û dizdî bi hawayêke cidî zêde bî. 

Cinîyê taxa Peyasî ya qezaya Kayapinarî ya Amedî de ciwîyenê, dîyar kerdî ke şaredarî wezîfeyê xo bi ca nêano û reaksîyon vera rewşe dayî.

 

‘Ma nêeşkenê tutanê bişawê mektebî’

 

Roniştoxê taxe Bedriye Kulliye, dîyar kerd ke taxe bi probleman dir rî bi rî ameya verdayîş û vat: “Taxe de xebitnayîşê tiryakî û rotişê ci zêde bîyo. Ma tersan ra nêwazenê tutê ma şêrê kuçe. Demê ma şinê cayêk zî ma ber serê tutanê xo de padanê. Reyan semedê na rewşe ma nêwazenê tutê ma yê kênayî şêrê mekteb. Ma tersenê. Serebûtê dizdî zaf bîyê zêde. Coka ma şandînan rehet nêeşkenê rakewê.”

 

‘Semedê kesê tiryakî xebitnenê kuçeyî ameyî padayîş’

 

Bedrîye wina vat: “Nê problemî bi serran o dewam kenê. Ma nêeşkenê kuçeyê xo ra derbaz bibê. Cayê ke ma şêrê zî heme kuçe ra derbaz benê. Derheqê nê de ma xeylêk rey muracatê keya kerd û ma gerreyê xo vat. La pêro muracatî veng ê. Seba asayîşî ma dekewtiş û vejîyayîşê kuçeyan girewt. Ma hîn wayîrê keyeyan ra nê qal kerd. La vatî şaredarî destûr dano înan. Tutê ma bi taybetî tutê kênayî hetê tiryakîyan ra yenê acizkerdiş. Semedê problemî kuçe ameyê girewtiş la no zî problemêk bîn o. Eke şaredarî bibayîne do asayîş bigirewtêne û kuçe newe ra biameyîne akerdiş.”

 

‘Bi serran o ma eynî problem ciwîyenê’ 

 

Jina bi nameyê Gulnaz Kosem zî wina vat: “Pakitî nêkenê. Bi serran o ma tîya yê. Eynî problem bi serran o dewam keno. Ma taxe bi îmkanê xo pak kenê. Ma veng danê şaredarî, nînê. Wexto yenê zî lêşînîyê ke pak kenê erzenê uca û şinê. Ma reyna eynî problemî dir yenê rî bi rî. Bi rojan boya pîs derûdor de vila bena. Keye de tutê min o nêweş û birîndar esto. Kuçe semedê lêşinî heme mîkrob o. Coka tutê ma nêweş kewenê. Ma her wext mecbûr manenê ke berê nêweşxane. Wa şaredarî karê xo bikero. Wa nê probleman ganî çareser bikero.”