Sema Çaglak

 

AMED - Keyeyê tepişteyan bale antî serê rewşa tepişteyan û vatî: "Heta ke tecrîd nêwurzo no do teda heme warey cuye de dewam bikero. Wexto ke tutê ma azad bibê do şarê ma zî azad bibo. Semedê nê zî têkoşîn lazim o."

 

Teda û zordarî, vilabîyayîşê virûsê koronayî (covîd-19) û sewbîna helwesta Sazgehê Tibê Edlî (ATK) ters û endîşeyê keyeyê tepişteyan zêde keno. Heta ke rewşa tepişteyan kewena sewîyeya tewr bi tehluke, dima ra serbest vera danê. No çî ramojneno ke vera tepişteyê sîyasî polîtîkayêk taybet yeno kerdiş. Keyeyê tepişteyan derheqê rewşa tepişteyan de fikrê xo ardî ziwan.

 

'Ganî tecrîd bêro wedaritiş'

 

Burhan Işik bi 6 serrî yo Zîndanê  Patnosî de tepişte yo û dayîka ey Ferah Işik ajansê ma rê wina qal kerd: "Cuya lajê mi her wext bi destbendkerdiş û tepiştişî dir derbaz bî. Vernîya 2008 de Sêrt de wendekar bi, uca ame tepiştiş û dima ra serbest ame veradayîş. La çend mengî dima reyke bîn ame tepiştiş. O wext 7 mengî zîndan de mend. Semedo ke hende ame tepiştiş û vera dayî fek unîversîte ra vera dayî û verê xo dayî Stenbol. wexto ke Stenbol de reyke bîn ame tepiştiş, 20 mengî zîndan de mend. Serra 2016 de zî Wan de ame tepiştiş û nika zî Zîndanê Patnosî de yo. Burhan, seba heqê xo bigîro her wext tewrê grevê vêşanîye bîne."

 

Ferahe dewam de wina vat: "Rojê vîyarte de mi bi lajê xo dir qisey kerd. Lajê mi dîyar kerd ke 'Do hemverê teda û zordarî zîndanan de xoverdayîşê xo dewam bikerê.' Goreyê mi heta ke tecrîd werte ra nêwurzo do zulm û zordarî her wareyê cuye de dewam bikero. Tecrîd hemverê ma hemine de bi ca yeno. Ganî semedê wedaritişê tecrîdî her kes mîyanê çalakîyan de bo."

 

'Eke tutê ma azad bê do şarê ma zî azad bo'

 

Cîhan Yaşar zî bi 6 serrî yo Zîndanê Amedî de tepişte yo. Dayîka ci Kudret Yaşar dîyar kerd ke gama lajê aye ameyo tepiştiş, 17 serre bi û 36 serrî ceza dayê ci û vat: "Tena lajê mi ney, cuya pêro tepişteyan zîndan de derrbaz bena. Zulm û zordarî xeylêk serê înan de yeno kerdiş. Bi taybetî hetê werdî de xeylêk probleman ma ciwîyenê. Ma înan rê pere şawenê la pereyê ke ma şawenê nêdanê înan. Wexto ke tecrîd wedarnê, do çîyê weşî vejîyê. Do tutê ma azad bibê, do şarê ma azad bibo."

 

Kudrete tewr peyîn wina vat: "Tepişteyî bi telefon dir zî nêeşkenê embazanê xo dir qisey bikerê û pêvînayîşê yewbînan dir zî qedexe kerdê. Ez veng dana keyeyan ke vera tecrîdî wurzê serê lingan. Wa êdî tutê ma azad bibê. Tutê ma azadîya semedê azadîya şarê xo  bi zulm û zordarî dir rî bi rî manenê. Ganî ma wayîrê tepişteyanê xo vejîyê."