Sema Çaglak

 

AMED - Do 16ê teşrîna verêne de Meydanê Îstasyonî yê Amedî de mîtîngê cinîyan bêro organîzekerdiş.  Aktîvîsta TJAyî Emîne Kaya vengdayîşê tewrbîyayîşê mîtîngî cinîyan kerd û vat: "Herême û Tirkîya de hemverê têkoşîn û azadîya cinî şerêk esto. Bi taybetî zî cinîyê xoverdayox hedef yenê girewtiş. La ma do hemverê rewşa tehlukeyê vera cinîyan meydan de bibê yew."

 

Tevgerê Cinîyan ê Azadî (TJA) û Partîya Herêmê Demokratîk (DBP) do 16ê teşrîna verêne de bi sloganê, "Nîjadperestî û cinsperestî rê êdî bes o, nika dem demê azadîya cinîyan o" Amed de mîtîngê herême organîze bikerê. Amedekarîyê semedê mîtîngî dewam kenê. Bajaran de cinî dew bi dewe, tax bi taxe gêrenê û qalê  amancê mîtîngê xo kenê û derheqê  çîyê sîyasî de cinîyan xeberdar kenê. Aktîvîsta TJAyî Emîne Kaya ajansê ma rê qalê rewşa cinîyê herême û Tirkîya kerd û vengdayîşê tewrbîyayîşê mîtîngî kerd.

 

'Hemverê azadîya cinîyan şerêk esto'  

 

Emîne wina vat: "Hûmara kiştişê cinîyan kewto sewîyeya tewr pîl. Hemverê kiştişê cinîyan êdî bêvengî û bêhelwestbîyayîş nêro qebûlkerdiş. Êdî na rewşa bi bêvengî yan zî bê helwestbîyayîş nîna çareserkerdiş. Coka semedê kiştişê cinîyan tewr zêde bêro vînayîş û şar tewr zêde xeberdar bibo ma mîtîng viraznenê. Ma do mîtîng de vajê ke hêriş û qirkerdişê cinîyan rê êdî bes o! Cinî hemverê hêrişê camêrdan de nînê pawitiş. Bi taybetî Tirkîya û herême de rewşa cinîyan dîyar a. Xora Tirkîya de qanûn semedê pawitişê cuya cinîyan û semedê asayîşê cinîyan nîno vetiş. Tirkîya de cinî rewşêke tehluke de yê. Hemverê azadîya cinîyan de şerêk esto."

 

'Rojawan, Şengal û Efxanîstan de eynî zîhnîyet' 

 

Emîne dîyar kerd ke ewro têkoşînê cinîyê kurdî dinya de bîyo nimûne û vat: "Nimûneyo tewr verê çiman zî  Şorişê Rojawan û têkoşînê cinîyê êzidî yê hemverê zîhnîyetê DAIŞî yo. Ewro eynî zîhnîyet Efxanîstan de hêrişê cinîyê efxanî keno. Labelê cinîyê efxanî sey cinîyê kurdî yê Rojawan senîn hemverê zîhnîyetê DAIŞî xover dabî, Efxanîstan de zî hemverê Talîbanî de xo ver bidê. Ma vînenê ke îqtîdarê camêrdan endîşeyê vînîkerdişî de yê. Cinîyê ke wayîrê hişmendîyê hemverê rêxistinê camêrdan xo bi rêxistin kenê. Ewro Efxanîstan de zî no aseno, coka tewr zêde hêrişê cinîyan kenê. Labelê pêwa nînan cinî têkoşîn û xoverdayîşê xo de bi qerar ê."

 

'Ma do 16ê teşrîna verêne de Meydanê Îstasyonî de bê' 

 

Emîne semedê mîtîngî veng da û vat: "Ma do hemverê opersayonê sîyasî, hemverê îqtîdarî meydanê mîtîngî de bê. Ma meydanan de cewabêk bidê zîhnîyetê faşîst. Ma veng da heme cinîyan ke 16ê teşrîna verêne de Meydanê Îstasyonî de bêrê têhet. Ma pîya azadî biqîrê. Ma na bawerî de yê ke bi tewrbîyayîşêke xurt, ma do tesîrê derûdorê xo bikerê. Ma do pîya hêrişê hemverê cinîyan pûç bikerê."