DÊRSIM - Dêrsim de çalakîya cayê mendişî ya wendekaran bena pîlêr. Hetê bînî ra semedo ke Wargehê Wendekaran ê Cinîyan ra 6 wendekarî ameyî vetene ciwanan verê wargehî de îdare protesto kerd.

 

Dêrsim de wendekaranê Zanîngehê Munzurî semedo ke bale biancê meseleya cayê mendişî ser  Meydanê Seyîd Rizayî de vizêr eşkerayîyêke daye.

 

Ciwanan pare kerd ke xeylêk wendekarî nêeşkayî keye kîra bikerê yan zî wargehan de ca bibê û teber de mendî. Ciwanan vat: ”250 wendekaran nê semedî ra keydê xo vindarnayî. Îdareyê wargehan wendekaran rê pê tebereştişî gef wanenê. Yew cil de 2 wendekarî manenê, odaya çar kesan de 10 tenî manenê. Dewleta ke heqê cayê mendişî nêdana wendekaran ça de ya? Dewlete bi nê hawayî sûc kena, heqê perwerdeyî binpay kena. Ganî mexdûrîyetê wendekaran bêro çareserkerdene.”

 

Dima saetanê şanî de Wargehê Wendekaran ê Cinîyan ra 6 wendekarî ameyî vetene. Wendekarî semedo ke na rewşe protesto bikerê verê wargehî de ameyî pêser. Ciwanan pê sloganan kerdişê wargehî protesto kerd.