Medya Uren

 

MÊRDÎN - Cinîyê Suryanî bi hawayêke hempar fistiqê dêrî arêdanê û semedê dêrî û wendekarê ke perwerdeyî vînenê xerç kenê. Nesmî Akgulum û Febro Acar vanê, zehmetîyê arêdayîşê fistiqan bi keda hempar şenik beno û ê bi kêf karê xo kenê.

 

Cinîyê Suryanî semedê cuyêka hempar benê nimûne. Dewa Axê ya girêdayê qezaya Mîdyadê Mêrdînî de ya cinîyê  Suryanî yê dewe semedê debara dêrî û wendekarê ke uca de perwerde vînenê fistiqan arêdanê û roşenê.

 

Dewa Suryanîyan a bi nameyê Axê ya girêdayê qezaya Mîdyadê Mêrdînî ya wayîrê tarîx û awankerdişê balkêşî yo. Sewbîna Dêrê Dayîka Meryeme mîyan de ca gêno. Herême de taybetmendîyê nê dêrî zî oyo ke yeno vatiş herême de yewin o. Dêrê ke her serre bi hezaran turîstan pêşwazî keno eynî wextî de zî bi hawayêke çalak beno merkezê xebate. Suryanî hema perwerdeyê xo û îbadetê xo tîya de kenê. Semedê nê lazimîyan pêşwazî bikerê xebate kenê.

 

'Ma bi hawayêke hempar xebityenê'

 

Xeylêk darê fistiqan derûdorê Dêrê Dayîka Meryem de ameyê ramitiş. Her serre zî nê mewsîmî de dewijê tîya yewbînan kom benê û fistiqan arêdanê.  Fistiqê ke bi hawayêke hempar yenê arêdayîş û semedê debarê dêrî yenê xerçkerdiş. Nesmî Akgulum ke Ewropa ra ameya serdayîşê dewe wina vana: "Ewro roja arêdayîşê fistiqan o. Ma zî semedê arêdayîşê fistiqan kom bîyê û bi hawayêke hempar fistiqanê dêrî çînenê. Demo ke ma arêdanê zî ma benê roşenê. No kar hetê heme Suryanîyan ra bi hawayêke zerrîwaşte yeno kerdiş."

 

'Baş o ke rastê na roje ameya'

 

Nesmîye bale ant serê qirkerdişê Suryanîyan û wina vat: "Ez zî Ewropa ra ameya û baş o ke rastê na roje ameya. Bi dewijanê xo dir xêrêke pîl kena. Çend serrî verê qirkerdişêk pîl serê ma de ame kerdiş. Kombîyayîşê ma semedê ma zaf bi erj o. Ma erjê xo hema zî pawenê. Ez coka xo bi şans hîs kena."

 

'Ma wayîrê erjê xo vejênê'

 

Febro Acar zî wina vat: "Serê herra ma de kulturê cuya pîya esto. Tena dîn beno sebebê kombîyayîşê ma. Şarê suryanî, komelê êzidî, şarê kurd û ereb serê eynî erdî de yê û têhet ciwîyenê. No kulturê Mezopotamyayî yo bi mîlyonan serrî yo dewam keno. Ma semedê dêrî cinî û camêrdî kom bîyê. Her keyeyî ra 1 an 2 kesî ameyî tîya. Serê sibayî heta ereyê şanî ma bênê tîjî de xebityenê. Ma hemverê zehmetî kêfweş benê. Ma pîya wext derbaz kenê û yewbînan rê benê hetkar. Eynî wextî de zî ma erje xo rê wayîr vejênê."