Hêlîn Asmîn

 

ŞEHBA - Dayîka Arîn Mîrkana ke nika xeylêk keyeyî nameyê tutanê xo danê ci û bî sembolê têkoşînî, Wehîde Henan serê serrgera aye de wina vat: "Arîne  tena kênaya mi nîya. Aye kênaya heme dayîkê cangorîyê azadîye ya. Kênaya bi çalakîya xo bî sembolê azadîye. Rayîrê Arîne rayîrê azadî û aştîye yo. Arîne û embazê xo senîn Kobanê xelisnayî do rojêke Efrînî zî xelas bikerê."

 

Kobanê ke bi şahidê wehşetêk pîl ê seserra 21ine, eynî wextî de bi wayîrê çalakîyê bi qerar û pîl. 5ê teşrîna peyêne 2014 de demê DAÎŞî bajarê Kobanê dorpêç kerdibi, Arîn Mîrkan ke Yewîneyê Pawitişê Cinîyan (YPJ) de fermandarî kerdêne, çalakîya fedaî kerdibî. Rojê ke Serekkomar Tayyip Erdogan vatêne, "Kobanê kewt ha kewt' Arîne Girê Miştenûrî de bi çalakîya ke kerdibî mesajê, "Do Kobanê nêko" dabî.

 

Arîn Mîrkan (Dilar Genco), serra 1992 de Dewa Mîrxan (Husê) ya qezaya Mabatayî ya Efrînî de ameye dinya. Dibistana sereyîn û mîyanên dewa Mîrxan de qedêna. Arîne serra 2007 de tewrê mîyanê refê Tevgerê Azadîya Kurdistanî bî. Arîne 5ê teşrîna verêne 2014 de Girê Miştenûrî de hemverê çeteyê DAÎŞî çalakîya fedaî kerd. Dayîka Arîn Mîrkan, Wehîde Henan serê serrgera Arîne de qisey kerd. Wehîde vat: "Kênaya mi bî meşaleyê azadîye."

 

'Arîne  bî vengê heme cinîyan'

 

Wehîde Henan dîyar kerd ke Arîn Mîrkan kênaya aye tena nîya û aye kênaya heme dayîkê cangorîyê azadîye ya û vat: "Ez bi çalakîya Arîne serberz û kêfweş a. Çalakîya Arîne semedê pêro şar û cinîyan bî. Arîne bi çalakîya xo verda ke dinya vengê heme cinîyan bieşnawo. Arîne keye de tuta eije bî. La zaf jîyatî bî. Keye de, mîyanê embazanê xo de serkewte bî. Eynî wextî de zî meraqê Arîne serê wendiş û nuştişî de bi. Mîyanê embazanê xo de zaf ameyîne heskerdiş. Xeylê rey mi rê qalê embazanê xo kerdêne û vatêne, 'embazê mi, mi rê zaf baş ê û mi ra hes kenê' mi ci ra vatêne, semedo ke ti mîyanê dewe de û embazanê xo de erjîyaye ya û ê zî to rê baş ê û to ra hes kenê."

 

'Mi Arînê mezin kir û şand nava şoreşê'

 

Wehîde wina qalê Arîne kerd: ''Arîna mi qij bî. Mi aye pîl kerd û şawite mîyanê şorişî. Mi her tim vatêne wa kênayêke mi bibo û semedê welatê xo têkoşîn bikero. Arîne keye de qet cîyayî nêkerdêne mîyanê ma û ma ra hes kerdêne. Arîne zaf biaqil bî, demo ke problem vejîyayîne safî kerdêne. Mîyanê embazanê xo de, wayê û birayê xo de her tim bi zerîyêka nizm nêzdî bîne. Embazê Arîne dimayê wendegehî ameyîne verê ci û semedo ke ziwan bimusê hewl dayîne. Arîne wendegehî de çi musayîne, ameyîne keye de embazanê xo musnayîne."

 

'Kênaya mi bi çalakîya xo bî sembolê azadîye'

 

Wehîde dîyar kerd aye bi Arîn Mîrkan serberz a û qiseykerdişê xo wina qedêna: "Wexto ke Arîne şehît kewte Roşanê Qurbanî bi. Waye aye Dîcle ameye verê mi û vat, Dilare (Arîn) Kobanê de şehît kewta. Ez qasêke bêveng menda. Peynî de mi vat, mi şehadetê kênaya xo eşnawit, wa kesêk bîn nêeşnawo. Ez bi kênaya xo serberz a. Kênaya mi bi çalakîya xo bî sembolê azadîye. Wexto ke ez kewta nê rayîrî mi zanayîne do rojêke tutanê xo nê rayîrî de vînî bikerî. Semedê nê ez kêfweş a la eynî wextî de dayîk a û sey her dayîkêke zerrîya mi veşena. Rayîrê Arîne rayîrê azadî û aştîye yo. Senîn ke Arîne û embazanê xo Kobanê xelisna, do Efrînê ma zî xelas bikerê."