AMED - Cinîyê dewa Pirahmedî ya Erxenî reaksîyon vera problemê pakîye û binsazgehî dayî û vatî: "Bi çend rey o ma semedê problemî muracatê selahîyetdaran kenê labelê ma tu netîce nêgînê."

 

Qezaya Erxenî ya Amedî de dewa Pîrahmedî semedê binsazgehê qelsî, rayîrî rijnayeyê û şaredarî çop arênêdana coka derûdor de zî lêşinîyêk girs esto. Roniştoxê dewe dîyar kerdî ke înan xeylêk rey muracatê şaredarî kerdê la problemê înan nêameyo çareserkerdiş.

 

'Çopî nînê arêdayîş' 

 

Cinîyê ke reaksîyon vera şaredarî dayî dîyar kerdî ke karê şaredarî zî ê kenê û vatî, bi taybetî 2 serrî yo şaredarî nê helwestê xo dewam kena. Dewijan ra Cahîde Guner vat, "Semedo ke şaredarî çop arênêdana, dewe de kêzikî û mêsî xeylêk zêde bîyê. Xebatkarê şaredarî tu karî nêkenê û wezîfeyê xo bi ca nêanê. Ma bi xo çopê dewe arêdanê û hewl danê dewa xo pak verdê. Pêwa ke vanê ma do çareser bikerê zî nêkenê."

 

'Keyeyê ma binê awe de manenê'

 

Sorgul Yer zî vat ke semedê binsazgehê dewe qels o û nîno zixmkerdiş dewe de golê herre virazênê. Songule dewam de wina vat: "Semedo ke borîyê awe nînê tamîrkerdiş û nînê pakkerdiş rayîrî binê awe de manenê û awe heta verê keyeyê ma ameya. Pêwa ke ma muracatê şaredarî kenê, rewşa ma safî nêkenê. Hetê pakîye de ma problem ciwîyenê. Tutê ma mîyanê herre de manenê û coka nêweş kewenê. Rewşa dewe qet baş nîya. Eke binsazgehêk zexm bibîne, do keyeyê ma binê awe de nêmendêne û boya xirab derûdorî de vila nêbîne. Ma veng danê selahîyetdaran ke problemanê ma safî bikerê."