Medya Uren

 

MÊRDÎN - Cinîyê Dewa Zonê ya Mêrdînî ke semedê debara xo bikerê gozan çînenê û ramitiş kenê, vanê ke semedê zamê dewlete ê krîzê ekonomî ra kewenê tengî û nêeşkenê îdareyê xo bikerê.

 

Cinîyê ke dewa Mêrdînî de ciwîyenê semedo ke debara xo bikerê bi karê ramitîşî dir eleqedar benê. Cinîyî amadekarîyê zimistanî kenê û hîn înan ra zî semedê debara xo berardişê ke arêdayê roşenê. Her çiqas dewijî bi ked û zehmetîyê xo pereyêk bi dest kenê zî binê tesîrê krîzê ekonomî de manenê. Cinîyê dewa Zonê ya Mêrdînî zî problemê xo yê semedê krîzê ekonomî pare kerdî.

 

'Semedê zamê dewlete ma nêeşkenê îdareyê xo bikerê'

 

Hayrîye Yilmaz ke Dewa Zonê ya girêdayê Mêrdînî de ciwîyena, bi dar û fêkîyê ke verê keyeyê xo de ramitê debara xo ya rojane ya keyeyî kena. Gozî, fêkî, sebze û zergûnayîyê tewir bi tewir hewşeyê xo de çînena. Pêwa ramitişî eynî wextî de heywanan zî wey kena. Hayrîye wina qalê roja xo kena: "Ma serê sibayî kewenê baxçe û heywanan rê ewnîyenê. Ma berardişê başî ci ra gênê. Emsar semedê kêmbîyayîşê varanî fêkî û gozî zêde nêgirewtê. La reyna zî qîmê keyeyî kenê. Xeylêk keyeyê ke nê çîyê ramitişî roşenê zehmetî vînenê. Semedê berardişêk zêde bi dest nêkerdê ke biroşê. Ma çiqas nêroşî zî ma zî zehmetî vînenê. Eke zamê ke dewlete serê ma de zêde kena nêbîne, ma do reyna bieşkayîne debara xo bikerdêne. La çi heyf zam paşta ma şikineno. Semedê zamê dewlete ma nêeşkenê îdareyê xo bikerê."

 

'Krîzê ekonomî xeylêk serê ma de tesîr keno'

 

Edlê Oral zî bi rotişê gozan debara xo kena. Edlê wina qalê gozanê emsarî kena: "Ma gozan hem roşenê hem kenê bastêq û meşlûl. Serra ke pawa zêde bê ma şanenê ro û roşenê. Labelê emsar zaf tay ê. Qîm nêkenê ke ma biroşê. Xeylêk dewijê ke bi nê çîyan debara xo kenê, zirarêk pîl dî. Bi taybetî krîzê ekonomî xeylêk serê ma de tesîr keno. Hetê debare de ma zî kewenê mîyanê tengasîyê pîlî."