COLEMÊRG - Birayê Ayşe Aksu ke Çerkezkoyî de amebî qetilkerdiş, Îsmet Taşma wina vat: “Waya mi qetil kerd, heto bîn ra şîyo keye û di kesê ke şahidîyê dewa kerdê, înan zî birîndar kerdo.”

 

Cinîya bi nameyê Ayşe Aksu (43) qezaya Çerkezkoyî ya Tekîrdagî de 4 mengî verê fek Remzî Aksu ra vera dabî û bi hîrê tutanê xo dir keyeyêk newe de bi ca bibî. 4ê teşrîna verêne de Ayşe demo ke tute xo berdêne wendegeh hetê camêrdo ke fek ci ra vera dabî, verê çimanê tute ci de amebî qetilkerdiş. Birayê Ayşe, Îsmet Taşma derheqê babete de qisey kerd û vat: “Ma nêzanê no kes çek ça de dîyo. Pêwa qerarê dûrvistişî, ame waya mi qetil kerd.”

 

‘Wa nê çimsûrî cezayê muebetî bigîrê’ 

 

Îsmet Taşma dîyar kerd waye ci 4 mengî verê fek mêrdeyê ke ci dir zewicnayebî vera da û tutanê xo dir keyeyêk girewt û tutanê xo dir ciwîyayîne. Îsmetî wina dewam kerd: “Mêrdeyo ke fek ci ra veradabi, waya mi taqîb keno û wexto ke waya mi tute xo bena wendegeh, rayîr de aye qetil keno. Heto bîn ra di şahidê dewa bî, kiştox şino keyeyê înan û înan zî birîndar keno. Ma nê hukmatî ra wazenê ke çimsûrê winasî cezaya giran ê muebetî bigîrê.”

 

‘Qerar binpay kerd’

 

Îsmetî vat, pêwa qerarê dûrvistişî waya ci ameya qetilkerdiş û vat: “Waya mi kênaya xo berdêne wendegeh. No qetilkerdişêk pîl o, ma ey edaletî rê verdenê. No kes eşkeno zirar bido tutanê xo zî. Eke tutî  wargeh de bimanê do tewr baş bo. Eke tutî verê keyeyê kiîtoxî de bimanê do zirar bivînê. Ma nêzanê o kes çek çara dîyo. Qerarê dûrvistişî binpay kerd û ame waya mi kişt. 4-5 saete dima ma merdimê xo yê ke uca de ciwîyenê xebera waya xo girewt.”