ANQARA  - Merala ke 25 serrî yo karkerîya vurnayîşî ke hedefê îqtîdarî de yo kena, dîyar kerd ke karê înan zehmet o, la desteştiş cinîyan rê yeno kerdiş û asayîşê ganê înan çin o. 

 

Rojê vîyarte de Stenbol, qezaya Bakirkoy û Umraniye de bi qerarê Walîtî sereştişê 100 ra zêdeyêr depoyê komkerdişî ame kerdiş. Sereştişan de semedê 240 kesê ke kaxidan kom kenê ceza ameye dayîş. Reyna 6ê teşrîna verêne de Ataşehîrê Stenbolî de polîs û zabiteyan eşt serê keyeyê ke kaxidan kom kenê. Nêzdîyê 200 karkerê ke komkerdişê kaxidan kenê ameyî destbendkerdiş. Umranîye de zî 3 karkerî

semedê nanê xo pawitî ameyî tepiştiş. Enqere de zî

karkerê ke kaxidan kom kenê eynî tedayî rê rast yenê.

 

‘Ganî sîstem bivuryo’

 

Karkera ke kuçe de kaxidan arêdayîne û nêwaşt nameyê xo bida, dîyar kerd ke yewin çimeyê debara înan komkerdişê kaxidan o û vat, krîzê ekonomîye şert û mercê cuye roj bi roje xidar keno. Sewbîna karkere dîyar kerd ke bi bahaneyê vîrusê korona, polîs û zabita ceza înan rê danê û vat, ganî no sîstem bêro vurnayîş.

 

‘Gelo ez xêrcê nê karî se bikerî?’

 

Cinîya bi nameyê Merale ke 25 serrî yo kaxidan kom kena, dîyar kerd ke bi mêrdeyê xo dir kaxidan kom kerdêne la di serrî verê mêrdeyê ci dinyaya xo bedilnayo û wina vat: “Ez cinîyêke bi tena sereyê xo ciwîyena. Ez bi nê karî debara xo kena. Ez 54 serrî ya. Nê emrî ra dima ez o se bikerî?”

 

‘Ez xo asayîş de hîs nêkena’

 

Merale vat, mecbûrî kaxidan kom kena û wina dewam kerd: “Merdimî mecbûrî ra nê karî kenê. Debara nê karî zehmet a. Şertê cuye qet asan nîyê. Ez menge ra hezar û 600 TL qezenc kena. Kîraya mi 500 Lîra ya. Fature zî zêde benê. Pereyêk kêm mi rê maneno. Ez serê sibayî zêde nêvejêna. Ver bi şanî vejêna. Şan de heta 9ine xebityena. La sey cinîyêke ez xo bi asayîş hîs nêkena. Xeylêk reyan desteştiş mi rê yeno kerdiş. Garantîyê ke do hêriş mi rê nêkerê çin o. Asayîşê ganê mi çin o.”

 

‘Ez kesî ra çîyêk nêpawena’

 

Merale tewr peyîn wina vat: “Ez tedayê serê karkeran baş zana. Sewbîna ameyîşêk mi çin o. Ez îqtîdarî ra çîyêk nêwazena. Ez tena hetkarî wazena, semedo ke nêeşkena kesêk bîn ra biwazî. Ez kesî ra bawer nêkena. Pabeyê mi kesî ra çin o. Ez nêweşa şekir û astimî ya. Semedê nêweşî ganî baş wey bibî. Dermanê mi bi rapor ê ez wina eşkena bigîrî.”