EDENE - 7 serrî serê Xebatkarê Azadîya Welat Kadir Bagdu ke hetê DAÎŞî ra ame qetilkerdiş derbaz bi. Cinîya Kadrî Şemsa ke Kadrî sey rojnamegerê bi bîsîkleta kewîye ameyîne naskerdiş qalê têkoşînê ci kerd û vat: "Heta ke ez helm bigîrî ez o taqîbkerdişê rayîrê ci bî."

 

Kuçeya Ovayî ya semtê Şakirpaşayî ya Qezaya Seyhanî ya Edeneyî de 14ê teşrîna verêne 2014 de Xebatkarê Rojnameyê Azadîya Welat Kadir Bagdu ke bi bîsîkleta kewîye rojname vila kerdêne hetê  DAÎŞî ra ame qetilkerdiş. 7 serrî serê qetilkerdişê rojnamegerê bi bîsîkleta kewîye derbaz bi.

 

Dimayê qetilkerdişê Kadrî, 2016 de cipersayîş ame destpêkerdiş û dîmen, nuşteyan ame eşkerakerdiş ke Servet Koç DAÎŞîj Kadrî qetil kerdo. Labelê pêwa nê tu averşîyayîşêk dosya de nêvirazya. Serdozgerîya Komare ya Edeneyî teşrîna verêne 2020 de nê qetilkerdişî sey, ''serebûtêk edlî" erjna û qerarê, "cigêrayîşê daîmî" ame dayîş. 

 

1993 de dewa Kadrî yena veşnayîş û yena vengkerdiş, keye koçê Edene keno. Demêk kilm de Kadrî rojnameyê Azadîya Welat de sey vilakerdox xebityeno. Cinîya ey Şemsa Bagdu bale ancena serê girêdayîşê Kadrî yê rojnameyê Azadîya Welat û wina vana: "Kadrî bi keda ke dayîne, waştêne bi hawayêke rûmet dinyaya xo bibedelno."

 

'Dewlete rehetî nêdayîne' 

 

Şemsa vat, Kadrî rojname zaf pîroz dîne û wexto ê 2004 de beşdarê eşkerayîyêke çapamenî bîyê bi  Kadrî dir ameyê tepiştiş û tutê înan bi mengan tena mendê û vat: "Wexto ke ma ameyî tepiştiş, Kadri mi ra vat, 'Meko ver, têkoşîn çîyêk wina yo. Ti do demêk nêzdî de tutanê xo bivînê.' Dimayê ke ma 4 mengî zîndan de mendî, ma ameyî tehliyekerdiş. Ser ra serrêke derbaz bi. Na rey ez û lajê xo ma ameyî tepiştiş. Dewlete rehetî nêdayîne. Reyke amebi destbendkerdiş îşkence bi ci amebi kerdiş. Di parsûyê ey amebî şikitiş. Reyna zî ey fek rojname ra vera nêda."

 

'Zaf kede da rojname' 

 

Kadrî verê ke bêro qetilkerdiş, merdiman ci ra vatêne, 'Fek rojname ra vera bide. Do çîyêk bêro sereyê to' la Kadrî merg ra nêtersayîne. Şemsa dewam de wina vat: "Merdiman ey ra zaf hes kerdêne. Ê xeylêk kede da rojname. Verê zî xeylêk sazgehan de xebityayîne. Labelê tewr zêde rojname ra hes kerdêne. Nêzdîbîyayîşê ey vera mi cîya bi. Tu wext mi qij nêdîne. Kesê ke cinîyan qij dîne înan dir têkilî nêdayîne ro."

 

'Rojnamegerê Kurdî rastîyan nusenê'

 

Şemsa wina qalê serebûtî kerd: "Cayê ke Kadrî ame qetilkerdiş, kamera bî labelê ê kemarayî cayê xo ra amebî wedaritiş. Semedo ke kiştoxî bêrê vînayîş, avûkatan xeylêk xo ver da. Labelê tu netîceyêk bi dest nêkerdî. Bi desan rojnamegerê kurdî ameyî qetilkerdiş. Çira nêameyî roşnkerdiş? Her cayê dinya de rojnamegerî estê, çira kurdî bi rehetî nêeşkenê rojnamegerî bikerê? Çike ê rastî nusenê. Semedo ke rastî ra tersenê wazenê teda bikerê. La ê se bikerê wa bikerê do neêşkê hemrayê Apê Mûsa biqedênê. Heta ez helm bigîrî ez o taqîbkerdoxê rayîrê ey bî."

 

'Ez qertê ey çapemenî wedarnena' 

 

Şemsa vat, wexto ke Kadrî ame qetilkerdiş, tutî dimayê ey bermayî û no ramojneno ke çiqas yeno heskerdiş. Şemsa dîyar kerd ke aye qertê Kadrî yê çapemenî hema wedarnena.