RIHA  - Nobeta Edaletî ya Emîne û Ferît Şenyaşar ke 9ê Adare ra ameya destpêkerdiş, roja 220 de dewam kena. Keyeyî mesajo ke serê medyaya dîjîtalî de pare kerd de vat, do bi serewedaritişî dir paştdayîş bi dest bikerê.

 

Nobeta Edaletî ya Keyeyê Şenyaşarî ke 3 ferdê ci hetê merdim û pawitoxê Parlamenterê AKPyî Îbrahîm Halîl Yildiz ra amebî qetilkerdiş, 9ê adare de dabî destpêkerdiş roja 220ine de dewam kena. Semedo ke pankartê roja 200yî de ame desterserkerdiş keye nobeta xo bêpankart dewam keno.

 

'Heta ke waştişê ma nêrê pêşwazîkerdiş ma tîya ra nêşinê'

 

Ferîtî dîyar kerd ke birayê ey Fadil Şenyaşar ke 3 serrî zêdeyêr o Zîndanê Xarpêtî de hucreyê yew kesî de maneno û vat: "Eke birayê mi bi hawayêke bêhet ameyîne muhakemekerdiş, nika mîyanê ma de bîne. Serê dosya de qerarê nimitişî esto. Ma fek her di waştişanê xo ra vera nêdanê. Heta ke waştişê ma nêrê pêşwazîkerdiş, ma tîya ra nêşinê."

 

'Ma do bi xoverdayîş û paştdayîş edalet bîyarê'

 

Keyeyî serê hesabê xo yê medyaya dîjîtalî de bi pankartê xo yê newe dir nê mesajî pare kerd: "Têkoşînê ma yê edaletî vernîya Edlîyeyê Rihayî de roja 220ine dewam kena. Semedê înadê kesê ke vanê Tirkîya de edalet çin o; ma do bi xoverdayîş û paştdayîş edalet bîyarê."