WAN - Amîne Kaya dîyar kerd, hîrê serrî yo lajê xo Mehmet Şîrîn Kaya ke Zîndanê Tîpê T yê Tokatî de tepişte yo nêvînena û vat, bi nê surgunan keyeyî yenê cezakerdiş.

 

Binpaykerdişê heqê zîndanan her ke şinê zêde benê.  Keyeyê tepişteyan ke tutê înan yenê surgunkerdiş, semedê problemê ekonomî nêeşkenê şêrê pêvînayîşê tutanê xo. Keyeyê tepişteyo bi nameyê Mehmet Şîrîn Kaya ke zîndanê Tîpê T yê Tokatî de yo, yew nê keyeyan ra yo. Dayîka Mehmet Şîrîn Kaya, Amîne Kaya hem seba problemê hem zî seba problemê weşîye bi 3 serrî yo nêeşkena şêro pêvînayîşê lajê xo. Mehmet ke Colemêrg de ame tepiştiş û berdîya zîndanê Tîpê F yê Wanî, 30 serrî ceza ci rê ameya dayîş. Dayîka Mehmet Amîne vat, semedo ke bi rehetî şêrê pêvînayîşê lajê xo  Colemêrg ra barkerdê Wan û dimayê ke ameyê Wan lajê ci surgunê Zîndanê Tîpê T yê Tokatî kerdê.

 

Bi serran o tena vengê ey eşnawena 

 

Amîne dîyar kerd, bi serran o lajê xo nêvînena, rewşa lajê xo zaf meraq kena û vat, hewte de tena 20 deqeyan vengê ci eşnawena û wina dewam kerd: “Kitab, cil û belgê ke ma şawenê zî nêdanê. Ez tena  bi telefon qisey kena. Ez nêzana sewbîna senîn o. Xeylêk teda ser ci de estê. Îdarekarê zîmdanî her tim tedayan keno. Ma Wan de manenê. Rewşa ma ya ekonomî baş nîya. Problemê ma yê weşîye estê. Semedê nê sebeban ez nêeşkena şêrî pêvînayîş. Ez wazena reyna lajê mi bîyarê Wan.”

 

‘Keyeyî yenê cezakerdiş’

 

Amîne vat, bi surgunkerdişî dir cezaya diyîne dayê lajê ci û vat: “Dewlete na ceza eynî wextî de dana ma zî. Dewlete xora ceza daya, hema çi wazena gelo? Xeylêk keyeyî şîne pêvînayîşê tutanê xo, qeza de dinyaya xo bedilnayîne. Gelo çi heqê înan esto nê kenê. Ma xora perîşan bîyê. Kezeba ma veşana. Tutê ma verê ma de nîyê. Şandînan wexto ke ez rakewena, lajê mi yeno verê çimanê mi. Her tim hişê mi de ya. Gelo uca de rewşa ey senîn a? Cemidyeno gelo? Werd werdo? Êdî psîkolojîyê mi xira bîyo. Sey pêro dayîkan kezaba mi zî veşena.”

 

Semedê merdimê tepişteyan vengdayîş

 

Amîne tewr peyîn vat, ganî keyeyê tepişteyan nê caardişan qebûl nêkerê û vengdayîşê têkoşînê pîya bi merdimê tepişteyan kerd.