Rojda Aydin 

 

ŞIRNEX - Wendekarê Komeleya Ziwan û Kulturî ya Birca Belekî, dîyar kerdî ke semedê ziwan vînî nêbo, xebatê bi nê rengî girîng ê û vatî: "Xovîrrakerdişê ziwanê kurdkî, vînîkerdişê kurdîtî yo. Ma do wayîrê ziwanê xo vejîyê.”

 

Komeleya Ziwan û Kulturê ya Birca Belekî ke 22yê êlule 2019 de, qezaya Cizîrê Şirnexî de ame akerdiş.  Komela ke dimayê ameye akerdiş, semedê pandemî mecbûr mende ke xebatanê xo bida vindarnayîş. La dimayê destpêkerdişê rewşa normalî, nika xebatanê xo newe kena. Nika kursê xo yê perwerdeyê bi ziwanê kurdkî kerd faliyet. Wendekarê ke tewrê perwerde benê, ajansê ma rê qalê rewşa ziwanê kurdkî kerdî.

 

‘Perwerde bi ziwanê kurdkî girîng o’

 

Wendekare Dîcle Akin, destpêkê qiseykerdişê xo de bale ant serê girîngiyê perwerdeyê ziwanî û vat: "Desptêkê perwerdeyî de xeylêk kêmîyê mi estbî, hêdî hêdî nê kêmîyê min ê serê ziwanî de kêm benê. Bi taybetî semedê rastnuştişî ez perwerde vînena. Verê sazgehê ke perwerdeyê bi kurdkî bidê çinbî û ma tena bi perwerdeyê ziwanê tirkî dir rî bi rî mendêne. Nika kêm bo zî sazgehê perwerdeyê ziwanî estê. Her çend mîyanê şarê ma de kurdkî bêro qiseykerdiş zî mîyanê neslê neweyî de bi kurdkî qiseykerdiş kêm o. Bi taybetî tutanê xo tirkî musnenê. Ganî tutî de ziwan bêro musnayîş, demo ke wina bo, merdim qet ziwanê dayîke nêkenê xo vîr ra.”

 

‘Tu ziwan vera ziwanê dayîke nêgîno’

 

Wendekare Rojîn Altintaş zî wina vat: "Hîn derûdorî vanê ke tîya Tirkîya yo û ganî şima bi tirkî qisey bikerê. Çîyêk wina çin o. Ma kurd ê û ziwanê ma kurdkî yo. Merdim çi ziwanî bizano baş o, la tu ziwan cayê ziwanê dayîke nêgîno û coka ma ganî ziwanê xo aver berê. Wexto ke ma ziwanê kurdkî xo vîr ra kerd, o wext ma do kurdîtîyê xo zî xo vîr ra bikerê. Ma verê ziwanê tirkî nêzanayîne la wendegehî de ez tirkî musaya. Wa keyeyê ma nêvajê ziwanê kurdkî erjan o û ziwanêk bîn tutanê xo nêmusnê. Sewbîna ganî wendegehê tirkî de zî bi kurdkî perwerdê bêro dayîş."

 

‘Semedê pawitişê ziwanî kurs girîng o’

 

Hemşaredara Cizîrî ke vera ci qeyûm amebi tayînkerdiş Bêrîvan Kutlu tewrê perwerdî bena wina vat: "Tarîxê dinya de heme netewî bi ziwanê xo yenê naskerdiş. Verê mîyanê komelê ma de qiseykerdişê ziwanê xerîb, sey çîyêk eyb ameyîne vînayîş û no zî semedê pawitişê ziwanê kurdkî çîyêk baş bi. Nika no ameyo vurnayîş û şar êdî bi ziwanê tirkî xo îfade kena. No sey kêmîyêk kewto mîyanê komelê ma. Bi taybetî ciwanê ma bi hawayêk heskerdiş êdî ziwanê xerîb ko kenê û qisey kenê.”

 

‘Ganî kurdkî bibo ziwanê perwerdeyî’

 

Bêrîvane tewr peyîn wina vat: “Wa tu kes nêvajo ke mi wendegehê tirkî de perwerde dîyo, yan zî goreyê wezîfeyê min ê fermî ganî ez tirkî qisey bikerî. Semedo ke ziwanê ma nêro xovîrrakerdiş ma ewro ameyê û perwerde vînenê. Ganî ma destûr nêdê ke ziwanê çewres mîlyon kurdî mîyanê cuye ra vejîyo û ziwanê serdestan biko cayê ziwanê ma. Herêma ma de bi hezaran wendekarê kurdî estê la wendegehan de destûr nîno dayîş ke ziwanê xo bimusê. Ganî ziwanê ma bibo ziwanê perwerdeyî sey her ziwanî.”