Berîtan Canozer

 

AMED - Taxêke girêdayê Pasûrî, 5 tutê ke şîne qursê Kuranî bi hêrişê cinsî yê îmamê bi nameyê Hamdusena C., ra rî bi rî mendî. serê gerrekerdişê keyeyan îmam ame destbendkerdiş.

 

Taxêke girêdayê qezaya Pasurî ya Amedî de ame dîyarkerdiş ke 5 tutê ke şîne qursê Kuranî bi hêrişê cinsî yê îmamê bi nameyê Hamdusena C, dir rî bi rî mendî. Tutê çîyê ke ciwîyayê keyeyê xo rê qal kerdê la semedo ke keyeyan bawer nêkerd, dimayê demêk mamosteyê xo rê vanê. Serê vatişê tutan de mamoste xebere da cendermeyan û dimayê gerrekerdişî, îmam hewteyêk verê ame destbendkerdiş. Goreyê zanayîşî îmam hema zî destbendkerde yo.

 

Heto bîn ra ame zanayîş semedo ke keyeyî gerre nêkerê, qorîcî û keyayê dewe tehdîd keyeyan rê kerdo.

 

'Bedenê înan sîya û kewe bîyo'

 

Şahidêk ke nêwaşt nameyê xo bido, dîyar kerd ke eynî dewe de verê zî tutêke rastê tecawuzî ameya û hetê qorîcîyan ra serê serebûtî ameyo padayîş û wina vat: “Serra 2017 û 2018 de tutêke bi hêrişê cinsî yê qorîcîyêk dir rî bi rî mende. Tute bî diganî û dima ra dewlete tute girewte binê pawitişî. Labelê qorîcî nêame destbendkerdiş zî. Serê serebûtî padayî û serebût zî ame xovîrrakerdiş. Nika zî wazenê serê nê serebûtî padê, 5 tutî bi hêrişê cinsî dir rî bi rî mendê. Keyayê dewe û qorîcî keyeyan gêrenê û vanê, ‘gerre mekerê, peyser biancê. Wazenê keyeyan bitersnê. Bedenê  tutan sîya û kewe bîyo. Îmam tutan rê şîdetê fîzîkî zî kerdo. Heme tutan serebût hem keye û hem zî mamosteyê xo rê vatê."

 

Ame zanayîş ke dozgerî semedê îfadeyê 5 tutan bêro girewtiş, veng dayo û demê îfadeyî de persa ‘tacîz çiyo’ tutan ra pers kerdo.

 

Heto bîn ra Muttiyê Qeza bi keya û îmamanê qeza dir kombîyayîş kerdo û vat, "Nê çî yeno vatiş wayîrê embazê xo vejîyê" Sewbîna tutê ke dîmenê hêrişê cinsî antê teslîmê cendermeyan kerdê.