Medya Uren

 

MÊRDÎN - Platformê Ziwanê Kurdkî Mêrdînî semedê temsîlkarîya xo akero dest bi xebatan kerd. Perîhan Agaoglu ya HDPyî derheqê xebatê platformî yê ke Mêrdînî yeno kerdiş zanayîş da û vat: "Yew ziwanê tewr kan û dewlemend, ziwanê kurdkî yo. La sey ziwanêko qedexe, sey 'X' yeno binamekerdiş. No semedê tarîxê merdimayî şermêk pîl o. Heta ziwanê ma bi hawayêke azad bêro qiseykerdiş ma do sey cinîyê kurdkî têkoşîn bikerê."

 

Platformê Ziwanê Kurdkî (PZK) semedê Mêrdînî temsîlkarîyê xo awan bikero bi partîyê sîyasî û ziwanzanan dir kom bî. Hemsereka Partiya Demokratîke ya Şaran (HDP) ya Mêrdînî Perîhan Agaoglu ke temsîlkarîyê platformî yê Mêrdînî de ca gêna, dîyar kerd ke heta ziwanê kurdkî bibo ziwanê perwerdeyî do têkoşîn bikerê û torra xo pîl bikerê.

 

'Qedexekerdişê ziwanî nîjadperestî bi xo yo'

 

Perîhane destpêkê qiseykerdişê xo de wina vat: "Ziwan bîyayîşê komelêkê yo û emperyalîzim serê asîmîlasyonê ziwanî xo dano awankerdiş. Semedo ke welat de hakim bo, ziwanê xo ferz keno û ziwanê bînan qij fîneno. Ewro zî hemverê şarê kurdî de asîmîlasyon yeno kerdiş. Wazenê bi nê rengî peynîya şarêk bîyarê. Ma nimûneyê nê qirkerdişî seserra 21ine de zî vînenê. Wendegehan de, nêweşxaneyan de cayê fermî de tut û dayîkê ma nêeşkenê xo bîyarê ziwan. Nameyê kuçeyanê ma, dewanê ma bi tirkî yenê nuştiş. Mêrdîn de wexto sela yena wendiş bi ziwanê tirkî û erebî yena wendiş. Teberê nê de Mêrdîn de ziwanê kurdkî û suryanî yeno qiseykerdiş. La no ziwan çin yeno hesibnayîş. No polîtîkayê sîyakerdişê koemlî yo. Nîjadperestî bi xo ye."

 

'Ziwano ke ci ra vanê 'X' ziwanê 40 mîlyonî yo'

 

Perîhane wina qal kerd: "Semedê îqtîdarê xo her çî meşrû vînenê. Tewr peyîn zî kurdkî sey ziwanê 'X' ameye neqlkerdiş. Ma bîyarê vîrê înan 40 milyon kurdî nê ziwanî qisey kenê. Sîyasetmedarê tirkî vatî, 'ziwanê kurdkî qîm nêkeno ke bi nê perwerde bêro dayîş.' Kesê ke nê şîrove kenê wa zehmet bikerê ke tay cigêrayîş zî bikerê. No vatiş semedê vistişê şarê kurdî û çinbîyayîşê înan yeno hesibnayîş. Ma nê qebûl nêkenê. Nika bi ziwanê kurdkî xeylêk cayan de perwerde yeno dayîş, nêweşxane ameyî akerdiş. Sazgeh û dezgeh û partî ameyê akerdiş. Bi ziwanê kurdkî bi seyan bi hezaran kitab, rojname vejênê. Heta nika kêmîyêk nêameyo vînayîş."

 

'Ganî ziwanê kurdkî bibo ziwanê fermî' 

 

Perîhane waşt ke kurdkî bibo ziwanê perwerdeyî û vat: "Ganî ziwanê kurdkî bibo ziwanê fermî, ganî madeyê qanûnî ke benê asteng bêrê wedaritiş. Sey xelatekê qenalê 'Trt Kurdî' akerdê. La o qenalêk musnayîşî nîyo. O binê berjwendîyên sîyasetê îqtidarî de yo. No qîm nêkeno. Ganî bi kurdkî doktorî bêro kerdiş, ganî dozgerî û huqûq bêro kerdiş. Ganî wendegê kurdkî bêrê akerdiş û no zî heta unîversîte dewam bikero. Ganî kurdî zî bieşkê problemanê xo bi hawayêke azad bi ziwanê xo çareser bikerê."

 

'Ma do torra xo pîl bikerê'

 

Perîhane tewr peyîn wina vat: "Ma do sey platform torra xo pîl bikerê û xebatanê xo bidê destpêkerdiş. Xeylêk bernameyê ma estê ke do demê bêrê de raya pêroyî rê bêrê hîrakerdiş. Ma do panelan, çalakîyan bikerê, perwerde bidê. Semedê ziwanê kurdkî bibo ziwanê fermî ma do Mêrdîn de xebatan dewam bikerê. Ma bi bawer ê do şar paştdayîş bido platform.