Rojda Aydin  

 

ŞIRNEX - Esma Ayaz ke 23 serrî yo tepişte ya û nika Zîndanê Cinîyan ê Şakranî ya, bi rayîrê keyeyê xo behsê tedayê zîndanî kerd û vat: "Ma veng dan şarê xo ke wa wayîrê tepişteyanê xo vejîyê. Cuya ma tehluke de ya. Zîndan de rewşêke keyfî esto.”

 

Zîndanê herême û Tirkîya de tedayê hemverê tepişteyan her roja ke derbaz benê zêde benê. Tepişteyî bi rayîrê keyeyê xo rewşa ke ciwîyenê raya pêroyî rê neql kerdî. Esma Ayaz 36 serrî ceza ci rê ameya dayîş û 23 serrî yo tepişte ya. Esmaya ke 8 rey ameya surgunkerdiş, nika Zîndanê Cinîyan ê Şakranê Îzmîrî de ya. Esma bi rayîrê keyeyê xo rewşa xo ard ziwan û dayîka ci zî vengdayîşê wayîrvejîyayîşî kerd.

 

'Cuya ma tehluke de ya' 

 

Tepişteya bi nameyê Esma Ayaz ke telefon de keyeyê xo dir qisey kerd û vat, “7ê teşrîna verêne de ma di qawişan ra vetî û qawişêke de kom kerdî. Labelê ma nê çî qebûl nêkerd û ma nêwaşt ke heme cinîyê tepişteyî qawişêk de bimanê. Ma nika di oda û qawişêke de yê. Embazê ma yê nêweşî estê. Camê qawişan şiknayebî û di roj verê viraştî. Hewşo ke ma hawa gênê serê ci têl kerdê û qamera ameyê bicakerdiş. Êdî cayê merdiman nîyo ke merdim ci de biciwîyo. Embazêke ma kanser bîya, cayê ke manena û cayê banyo zaf lêşin o. Uca de rewşêka zaf xidar esta. Tu kes persê ma nêkeno. Ma avûkat û pawitoxê heqê merdiman kenê ke wa bêrê zîndan. Sewbîna ma veng danê şarê xo ke wa wayîrê tepişteyan vejîyê. Semedê qamerayan ma nêeşkenê gamêke zî bierzê. Qawişê bînî nika veng ê. Ma xeylêk nêrehetê. Cuya ma tehluke de ya. Embazê ma yê ke biameyîne tehlîyekerdiş, labelê nêameyî tehliyekerdiş. Zîndan de rewşêka keyfî esta."

 

'Ma do heta peynî serê rêça tutanê xo de bê'

 

Dayîka Esma Ayaz, Emîne Ayaz zî vat, kênaya 23 serrî yo tepişte ya û wina vat: "Semedo ke emrê mi pîl o, ez nêeşkena şêrî pêvînayîşê kênaya xo. Coka bi 6 serrî yo mi kênaya xo nêdîya. Kênaya mi 23 serrî yo bodrumêke de ya. Zulmê tepişteyan kenê. Ehlaq û wîcdanê înan nêmendo. Ma zulm û zordarîyê serê tepişteyan qebûl nêkenê. Ma do heta peynî serê rêça tutanê xo de bê."

 

'Ganî ma vengê xo berz bikerê' 

 

Emîne, tewr peyîn wina vat: "Ez tu wext zulmo ke serê tepişteyan de yeno kerdiş qebûl nêkena. Zerrîya ma dayîkan veşêna. Tu welatêk de nimûneyêk wina çin o. Vengdayîşê ma dinya rê oyo ke vengê ma bieşnawê. Hukmat ewro bêwijdanî keno. Heta ma ra bêro ma do vengê xo berz bikerê. Kênaya mi heta nika  surgunê 8 zîndanan ameya kerdiş. Zîndanê Sêrt, Êlih, Mîdyat, Gebze, Şirnex, Wan, Baybûrt û tewr peyîn zî Zîndanê Şakranî ameye kerdiş."