WAN/COLEMÊRG - Reaksîyon û nerazîbîyayîşê hemverê cezaya Vervatoxa Demî ya TJAyî Ayşe Gokkan dewam keno. Cinîyê Wan û Colemêrgî dîyar kerd ke cezaya ameyî dayîş semedê heme cinîyan rê ameya dayîş bi rêxistinê têkoşînê xo yê azadî dewam bikerê.

 

23in roniştişê dewaya Vervatoxa Demî ya Tevgerê Cinîyan ê Azadan (TJA) Ayşe Gokkan bi îdiayê "îdarekarê rêxistine","endamîya rêxistine" amebi akerdiş 9in Dadgeha Cezaya Giran ya Amedî rojê vîyarte de amebi vînayîş. Dadgehe 30 serrî ceza Ayşe Gokkan rê da. Reaksîyon hemverê  ceza dewam keno. Cinîyê Wan û Colemêrgî bi şîdetê ceza şermezar kerd û fikrê xo ajansê ma rê vat.

 

'Bi ceza mesajê 'îtaet bikerê' ame dayîş'  

 

Endama Komeleya Cinîyan ê STARê Wanî Mîzgîn Bor, dîyar kerd ke hemverê cinîyan polîtîkayêk dişminî yeno kerdiş û vat: "Bingehê cezaya ke dayî Ayşe mesajê, 'îtaat bikerê' esto. Na ceza hemverê têkoşînê cinîyan ameyo dayîş. Îqtîdar hem zere de û hem zî teber de êdî polîtîkayêk vindîkerdişî dewam kena. Faîlê ke tecawuz û kiştişî yê cinî û tutan kenê bê ceza verdenê la cinî yenê cezakerdiş. Çîlem Dogan semedo ke pawitişê xo kerd ameye cezakerdiş, bi nê rengî faîlî zî ameyî xelatkerdiş. La ganî bêro zanayîş ke her şert û mercan de do têkoşînê xo dewam bikerê. Ayşe Gokkan rûmetê ma ya."

 

'Bi seyan cinî do serê xeta Ayşe Gokkan de têkoşîn bikerê'

 

Aktîvîsta Tevgerê Cinîyan ê Azadan (TJA) Şehrîban Ersayan zî wina vat: "Ma do têkoşînê xo dewam bikerê. Ceza yena manaya ke têkoşînê cinîyan ra tersenê. Wa bizanê ke na ceza cinîyan nêtersnena. Bi seyan û bi hezaran cinî do xeta Ayşe Gokkan de têkoşînê xo dewam bikerê."

 

'Ma kurd ê, cinî yê û heqdar ê' 

 

Hemsereka Partîya Demokratîke ya Şaran (HDP) a Qezaya Merkezî ya Colemêrgî Sînem Seven wina vat: "Îqtîdarê faşîst rêxistinbîyayîşê cinîyan ra terseno û coka cinî ça bi rêxistin bo uca rê hêriş keno. Ayşe Gokkan semedo ke pawitoxê heqê merdiman bî ameye cezakerdiş. Zîhniyetê serdest ê camêrdan hêzê cinîyan ra terseno. Beno ke Ayşe Gokkan nika tepişteye bo la têkoşînê aye teber de dewam keno.  Zîndanan de tepişteyê cinî xoverdayîşêk pîl danê. Heta ke nê cinî azad nêbê komel azad nêbeno.  Ma do heta zîhniyetê serdest yê camêrdan berê ma do têkoşîn bikerê. Ayşe Gokkan vat, 'Ma kurd ê, cinî yê û heqdar ê."

 

'Wayîrê têkoşînê hemrayanê xo vejîyê'

 

Hemsereka HDPyî ya Colemêrgî Humeyra Armut zî wina qisey kerd: "Ayşe bi serran o semedê cinîyan xebate kena. Îqtîdaro ke hemverê qirkerdişê cinî, fuhuş û hişbir çîyêk nêkeno la cinîyê ke hemverê nê têkoşîn kenê 30 serrî ceza yena birnayîş. Heme cinî şexsê Ayşe Gokan de parçeyêk nê têkoşînî yê. Ma wayîrê têkoşînê Ayşe Gokkan vejênê û ma parçeyêk nê têkoşînî yê. Heta cinî azad bibê, her cinîyêk bireso wayîrê nasname, zanebîyayîş ma do xebatê xo dewam bikerê. Heto bîn ra ma tîya veng danê cinîyan ke wayîrê têkoşînê hemrayanê xo bikerê."