Melîke Aydin

 

ÎZMÎR - Cinîyan reaksîyon vera cezaya Vervatoxa Demî ya TJAyî Ayşe Gokkan ameya dayîş dayî û dîyar kerdî ke ê kîşte TJA û Ayşe de yê. Cinîyan vengdayîşê vejîyê meydanan kerdî.

 

Roniştişê Vervatoxa Demî ya Tevgerê Cinîyan ê Azadan (TJA) Ayşe Gokkan 20ê teşrîna verêne dd 9in Dadgeha Cezaya Giran ya Amedî de ameye vînayîş û 30 serrî ceza ci rê ameye dayîş. Reaksîyonê hemverê ceza dewam kenê. Cinîyê Îzmîrîjî dîyar kerdî ke bi na ceza wazenê çimê cinîyan bitersnê û tevgerê cinîyan ê kurdan îzole bikerê. Cinîyan mesajê ‘Ma kîşte TJA û Ayşe de yê’ dayî.

 

Semedê cinîyê ciwanan mesaj

 

Meclîsê Cinîyan ê Partîya Demokratîke ya Şaran (HDP) ê Îzmîrî Îdîl Ugurlu dîyar kerd ke Ayşe cinîyê ke hemverê sîstemê serdest yê camêrdan têkoşîn bikerê, Leyla Guven hetê cinîyan ê dinya de rayber a û vat: “Sîstemê serdest yê camêrdan şexsê Ayşe de wazena têkoşînê cinîyan ceza bikerê. Nîmeyê emrê merdiman 30 serrî yo. Bi cezaya ameya dayîş de mesajê, ‘şima têkoşînê cinîyan dewam bikerê do peynîya şima sey Ayşe bo’ danê cinîyê ciwanan.”

 

‘Sucdarî hacetê hedefê sîyasî yê îqtîdarî yo’

 

Mor Sarmaşikî ra Berfîn Kaya zî wina vat: “Tirkîya êdî sucê hetkarîya rêxistine, propagandayê rexistine, hedefê xoyê sîyasî de sey hacet xebitnena. Ayşe verê hemşaredar bî. Hêrişê destkewtişê cinîyan û komelî ame kerdiş. Îqtîdar bi dewayê eletewş wazeno têkoşînê cinîyan vila bikero, bifîno yewbînan. Ma femînîstî destûr nêdanê nê. Ma kîşte Ayşe û heme tepişteyê sîyasî de yê. Ma têkoşînê xo yê hemverê patrîyarkal kapîtalîzmî dewam kenê.”

 

‘Ceza nêdanê tecawuzkeran’

 

Paştdayîşê Morî ra Denîz Uslu wina ercna: “Hewl danê ke cinî sîyaset nêkerê, vatişê înan bibirnê, bikerê binê teda. Ma hem kîşte TJA û hem zî kîşte Ayşe de bê. Semedê Ayşe berat bikero ma do hewl bidê. No welat de semedê tecawizkaran ceza nîna dayîş. La yê ke têkoşînê cinîyan kenê yenê cezakerdiş.”

 

Semedê tewr bîyayîşê wareyan veng

 

Ciwanê Demokratîkê Newe Zîlan Tayboga zî dîyar kerd ke do hemverê bêhuqûqî bêveng nêmanê û vat: “Nê hêrîşî hemverê heme cinîyê Kurdî û cinîyan o. Bi amancê desteserkerdişê nê yenê kerdiş. Ez veng dana pêro cinîyan ke semedê Ayşe û heme cinîyê ke têkoşînê cinîyan danê vejîyê wareyan.”