Rojda Aydin

 

ŞIRNEX - Ame zanayîş ke Silopî de cinîya diganeye bi nameyê A., 15ê teşrîna verêne de bi hêrişê cinsî dir rî bi rî menda. Sewbîna vejîya werte ke A., verê zî hetê eynî kesî ra ameya taqîbkerdiş.  

 

Vejîya werte ke taxêke qezaya Silopî de cinîya digane bi nameyê A., hetê kesê ke nasnameyê ci nêdîyar de bi hêrişî cinsî dir rî bi rî menda. Ame zanayîş ke serebût 15ê teşrîna verêne de ameyo ciwîyayîş û ame diyarkerdiş ke versuc vindî yo.

 

A. ke bi hêrişê cinsî dir rî bi rî mende ajansê ma rê qisey kerde.

 

A. vat, 15ê teşrîna verêne saete dorê 15.00 de serebût ameyo ciwîyayîş û wina vat: “A roje vistewre û mêrdeyê mi keye de nêbî. Ez û di tutê min ê qij tena bî. Semedo ke werd bipewjnî mutbex de bîya. Semedo ke biroj bi mi berê keyeyî akerde verda. Mi eşnawit ke yew dano ber ro. Dima ra ez şîya verê berî, camêrdêk verê berî de bi û mi ra şekir waşt. Ez ê camêrdî nas nêkena. Semedo ke ci rê şekir bîyarî ez şîya mutbex. Wexto ke ez mutbex de bîya o zî pey mi de ameyo. Wexto ke ez pey xo fetilyaya o kes pey mi de bi. Bi solanê xo kewtibi keye. Mi do tam bikerdêne qêrînayîş bi qirike mi girewt û hêrişê mi kerd. Cilê serê mi pêro dirna. Semedo ke qirike mi girewtib, ez nêeşkaya biqîrî zî. Dima ra ez dewxe ra şîya. Wexto ke ez ameya xo o kes remabi. A roje ez bi lez şîya nêweşxane. Doktor mi mûayene kerd û vat, çîyêk to çin o. Labelê pitika mi beno ke zirar dîya. Mi cuya xo de o kesî qet nêdîyo û nas zî nêkena.”

 

Pitika mi tehluke de ya

 

A., dîyar kerd aye 5 mengî diganeye û wina vat: “O camêrd wexto ke hêrişê mi kerd, bi pehnan da pîzeyê mi ro û da paşta mi ro. A roje ra nat ez tevgerê pitika xo hîs nêkena. Beno ke rewşa pitika mi tehluke de bo. Doktor ultrasyon ra ewnîya û vat ke beno ke pitike zî zirar dîyo. Sewbîna doktorî vat, beno ke paşta

pitike şikîyayo zî.  Eke çîyêk bêro sereyê mi pitika mi berpirsyarê ci o kes bi xo yo. No hêrişê ke mi rê ameyo kerdiş beno ke bi zanebîyayîş û plankerde bo zî.”

 

Verê zî ameya taqîbkerdiş!

 

A., vat, 7ê teşrîna verêne eynî kesî ci taqîb kerdo û vat: “Ez 7ê teşrîna verêne de şîbîya weqfêk. O camêrdî mi taqîb kerd, mi dir eynî otobûse rê espar bi. Dimayê a roje ra çîyê ke ameyî ciwîyayîş, vîrê mi ra nêşinê. Psîkolojîyê mi xira bîyo. Ez key çimanê xo padî o wext yeno vîrê mi. Ez nêeşkena keye de bi tena sereyê xo bimanî. Nêeşkena şêrî cayêk.”

 

Muracatê sucî kerdî

 

A., tewr peyîn vat muracatê sucî kerda û wina qiseykerdişê xo qedêna: “Heta o kes bêro vînayîş û cezakerdiş ez o nêvinderî û bêveng nêmanî. Emniyet de îfadeyê mi ameyî girewtiş. Mi muracatê sucî kerd. Ez o tu wext fek dewa ra vera nêdî. Ez wazena ke heme cinî û sazgehê cinîyan paştdayîşê mi bikerê.”