STENBOL - Cinîyan tecrîdê giran yê serê Rayberê PKKyî Abdullah Ocalanî de ercnayîş kerd û dîyar kerdî ke tecrîdê serê heme komelî de yeno kerdiş û vatî: "Ganî ma nuqteyê hempar de bêrê têhet."

 

Tecrîdê giran ê serê Rayberê PKKyî Abdullah Ocalanî her ke şino giran beno, 7 mengî yo xebere ci ra nîna girewtiş. Muracatê avûkatan ê semedê pêvînayîşî pozîtîf û negatîf cewabêk nîno dayîş. Tecrîdê Îmraliyî bêguman serê komelî de bi tesîr o. Şarê Kurdî zî bi rayberîya cinîyan hamleyê ‘Dem demê azadîye yo' dayî destpêkerdiş û her cayê azadîya Abdullah Ocalanî wazenê.

 

'Ganî ma nuqteyê hempar bêrê têhet' 

 

Endama Partîya Demokratîke ya Şaran (HDP) Zelîle Gokçe vat, semedo ke Abdullah Ocalan bi komelî dir nêkewo têkîlî tecrîd yeno girankerdiş û wina vat: “No tecrîd newe nîyo. Îqtîdarê ke yenê nê prosesî dewam kenê. Eke tecrîd bêro wedaritiş, zanê ke heme dinya vengê zîndanî bieşnawo. Ganî ma  dest bidê yewbînan û çîyê ke yenê ciwîyayîş dinya ra vajê. Dinya açarnayî tecrîdêk akerde. Ma nêeşkenê eşkerayîyêk zî bidê. Ma nêeşkenê xebate bikerê. Hemserek, hemşaredarê ma tepişteyê. Ma komelî de sey ‘terorîst’ yenê binamekerdiş. Heme kesê cîya fikrîyenê yenê tecrîdkerdiş. Semedê şikinayîşê tecrîdî ganî ma xo  rêxistin bikerê, xurt bikerê, nuqteyêk hempar de bêrê têhet."

 

'Ê şer wazenê ma aştî'

 

Endama Înîsiyatîfê Dayîkê Aştîye Hulya Duman zî wina vat: “Tecrîd tena serê Abdullah Ocalanî de ney, serê heme kurdan de yeno kerdiş. Bi nê metodî wazenê kurdan çin bikerê. Her roje destbendkerdiş û teda yenê ciwîyayîş. Ciwanî, cinî yenê remnayîş, tacîzkerdiş. Ez na rewşe şermezar kena. Tecrîdê serê Birêz Ocalanî serê şarê kurdî zî yeno kerdiş. Bi serran o no tecrîd dewam keno. Ê şer wazenê, ma aştî wazenê. Înan tu wext aştî nêwaşt. Ma wazenê ke tecrîdê serê Abdullah Ocalanî yê zîndanan peynî bo. Ganî heme dayîkî vengê xo berz bikerê. Bi çend dayîkan no problem çareser nêbeno. Ganî ma vera nê wehşetê  dewlete vengê xo berz bikerê. Yan zî ê qet nêvindeno.”

 

'Dewlete semedê tersena tecrîd kena'

 

Endama Însiyatîfê Dayîkê Aştîye Arîfe Yalvaç zî wina vat: "Wa şer û merg vindero. Ma aştî wazenê. Wa tecrîdê serê dayîkan zî wurzo. Serê heme şarê ma de teda û tecrîd yeno kerdiş. Demo ke ma qisey kenê, yan kişenê, yan remnenê yan zî tepişnenê. Wa nê tecrîdî wurznê, zerreyê dayîkan rehet bikero. Ma bikişi zî ma do heta peynî têkoşîn bikerê. Ma zanê ke sebebê tecrîdî tersê dewlete yo. Ma wazenê tecrîd wurzo, aştî bi ca bêro. Semedê nê wa heme dayîkî wurzê serê lingan."