Evîn Zenda

 

ŞENGAL - Vervatoxa TAJÊ Sebîha Sebrî, dîyar kerd ke raydayîş de weçînayîşê şarî nêame goşdarîkerdiş, îradeyê şarê Herêma Federal a Kurdistanî esas nêame girewtiş û vat: "La ganî bêro zanayîş ke her roje şino vera plan, hêriş û hileyan komelê ma aya beno û qerarê têkoşînêk tewr bihêz beno. Seba awankerdişê azadîya komelê êzidî û naskerdişê statu ma do her wext tewr zêde bixebityê."

 

10ê teşrîna verêne de Iraq de weçînayîş ame kerdiş û seranserê Iraqî de tena se ra 41 şar şi serê  sindoqan. Şengal de zî dayeyêk kêm beşdar bi. Goreyê netîceyê Şengalî heqê 83 hezar kesî bibi raya xo bixebitinê, la tena rayê 13 hezar kesan ameyê humartiş. Partiya Azadî û Demokratîke ya Êzdiyan (PADÊ) serê netîceyê weçînayîş û hîleyê gerreyê xo Komisyonê Weçînayîşê yê Berzî yê Nînowayî kerdibi. Îdarekerdişê Xoser ê Şengalî zî serê netîceyê weçînayîşî de helwestê xo ramojna û diyar kerd ke rastî de no weçînayîş hetê şarî ra nêameyo tesdîqkerdiş û meşruiyetê ci çin o. Çend serê weçînayîşî de wext derbaz bibo zî hem azî derheqê netîceyê weçînayîşî de nîqaşî yenê kerdiş. Vervatoxa Tevgerê Azadiya Cinîyan ê Êzidî (TAJÊ) Sebîha Sebrî zî derheqê babete de fikrê xo ajansê ma rê vat.

 

Wargehê multecîyan de astengîyê raydayîşî 

 

Sebîha, dîyar kerd ke weçînayîşê rewî yê parlamentoya Iraqî 10ê teşrîna verêne de ame kerdiş xeylêk dek û dolap virazyayî û vat: "Weçînayîşan de xeylêk fêl û fen ameyî kerdiş. Cayê ke hêvî ci de bi xeylêk têmîyankerdiş bi. Yew nê cayan ra zî Şengal bi. Şengal de 83 hezar kesî tena 13 hezar kesî şî  serê sindoqan. Kesê ke şî serê sindoqan zî bi probleman dir rî bi rî mendî û raydayîşê înan ame astengkerdiş. Dîyar bi ke vernîya weçînayîşî amadekarîyê fêl û hîleyan ameyê kerdiş. Destê xêrnêwaştoxan zaf bi. Wargehê multecî yê başûrê Kurdistanî zî teberê namzetê PDKyî nêverdayî şar veng bido namzetêk bîn. Multecî bi tehdîdan dir rî bi rî mendî. Heme kayî bi muşahedeyê heyetê Neteweyê Yewbîyaye virazya. Raydayoxê ke şî serê sindoqan zanê serê sindoqan de çi kayî ameyî kerdiş."

 

'Komelê ma wayîrê PADÎ vejîya'

 

Sebîha Sebrî, dîyar kerd ke PADÊ her şert û mercan de verê komelê xo de bi û vat: "Demê tewr zor û zehmet de partî verê komelê xo de bi. Komelî rê bi hetkar. Vernîya fermanî zî û ferman de zî her tim bi komelê xo dir bî. Hêvîya komelî partî rê esto û bi taybetî zî hêvîya cinîyan partî rê esto. PADÊ bi goreyê rastî û heqîqetê komelê ma kar û xebate keno. Komel weçînayîş de bi xebatê xo wayîr partîya xo vejîya û xebate vetî sewîyeya tewr berz."

 

'Heta azadî do têkoşîn dewam bikero' 

 

Sebiha qiseykerdişê xo wina qedêna: "Ma do birînê xo derman bikerê û Şengalê xo awan bikerê. Her roja ke şino plan, hêriş û hileyan ra komeleyê me şiyar beno û qerarê têkoşînêk tewr bihêz dano. Semedo ke ma şarê xo rê bibê cewab, seba awankerdişê azadîya komelê êzidî û naskerdişê statuyê xo ma do xo herdem tewr beşdarê kar û xebatan bikerê.”