Derya Ren

 

AMED - Hemşaredara verê ya Kerboranî Zeynep Sîpçîk ke 5 serrî û 8 mengî yo tepişte yena muhakemekerdiş, roniştişê aye her tim bi bahaneyê ‘do şahidê nimte bêrê goşdarîkerdiş’ yeno taloqkerdiş.

 

Hemşaredara verê ya Kerboranî Zeynep Sîpçîk 2016ine de dimayê tayînkerdişê qeyûmî, bi îdiayê ‘endamîya rêxistine’ 30ê Adara 2016 de ameye destbendkerdiş û roja bîn ameye tepiştiş û berdîya zîndanê Tîpê  E yê Mêrdînî. dima ra bi bahaneyê asayîşî surgunê Zîndanê Cinîyan ê Sîncanî kerdî.

 

Yewin roniştişê dewaya derheqê Zeynebe de Dadgeha Cezaye Giran ya Mîdyadî de ameye vînayîş. La  heyetê dadgehe bi bahaneyê asayîşî neqlê dewa kerd. Dima ra 5in Daîreyê Cezaya Dadgerî qerar da dewa 2yîn Dadgeha Cezaya Giran ya Wanî de bêro vînayîş. Heyetê dadgehe 13ê Hezîrana 2019 de bi îdiayê ‘endamîya rêxistine’ 13 serrî û 6 mengî ceza da Zeynepe.

 

Daîreyê Cezaya Dadgeha Edliyeyî ya Herêma Erziromî 21ê êlule 2020 de bi bahaneyê 'Şahidê nimte nêameyê goşdarîkerdiş û heme dosyayan ra pawitiş nêameyo girewtiş' qerarê xirakerdişê dosya da. Dimayê nê qerarî dosya 2yîn Dadgeha Cezaya Giran ya Wanî de ameye vînayîş. Heyetê dadgehe qerarê goşdarîkerdişê ‘şahidê nimte Burhan’ da, la serrêke yo muhakeme dewam keno û xo nêresnayê şahidê nimte.

 

Derheqê babete de dayîka Zeynepe, Hecîce Sîpçîk û avûkatê dewa Erdal Kuzu qisey kerd.

 

'Qeşmerîyê xo bi ma kenê'

 

Hecîce dîyar kerd ke kênaya aye Zeynepe wextê îdarekarîyê xoser de semedê nêweşîyêke Amed de ameyîne dermankerdiş û wina vat: "Dadgeha ke kênaya mi muhakeme kena, her rey vana do şahidê nimte bêrê goşdarîkerdiş û roniştiş taloq kena. Vanê şahidê nimte la o kes ça de yo? Ma şîne roniştiş sey qeşmerî bi ma bikerê. Menga vîyarte de roniştişê kênaya mi bi. Dimayê roniştişî mi bi telefon kênaya xo dir qisey kerd û  aye vat, dadgerî înan goşdarî nêkerdo, bi telefonê xo kay kerdo. No nêheqîyêk pîl o. Hema roniştiş yeno taloqkerdiş. Sûcê ke kenê milê kênaya mi, tu rastîya înan çin ê, tu tespîtêke înan çin o."

 

'Îtîrazî yenê redkerdiş' 

 

Avûkat Erdal Kuzu zî dîyar kerd ke  Zeynepe bi bahaneyê ‘îfadeyê şahidê nimte' 5 serrî û 8 mengî yo tepişte ya û wina vat: "Dadgeh şaşîyê ke keno, semedê dewamkerdişê tepiştişê Zeynebe sebeb mojneno. Amancê dewa oyo ke hemşaredarî bê delîl bêrê cezakerdiş. Îtîrazê ke semedê tepiştişê aye yenê kerdiş zî bi qerarê şablonî yeno redkerdiş. Semedê nê mimkin nîyo ke ma vajê dewa adîlane yena kerdiş."

 

'Tirkîya de resmê sîstemê muhakemeyî'

 

Erdalî tewr peyîn wina vat: “Bi bahaneyê şahidê nimte siyasetmedaran ceza kenê yan zî tepişte verdenê. No refleksêk tîpik ê dewlete yo. Hukm bîyo hacetê înan. Rewşa ke ceza dayê Zeynebe bêro tesdîqkerdiş zî ganî înfazê ci biqedîyo. La pêwa nê hemine qerarê veradayîşê Zeynebe nîno dayîş. Prosesê muhakemeyê Zeynebe resmê hukmê bîyayeyê Tirkîya yo."

 

Roniştişo bîn ê Zeynebe 2ê Kanûna 2021 de bêro vînayîş.