AMED - Meclîsê Ciwanan ê HDPyî ke çarçewaya kampanyaya "Ma tîryakî biterêknê, cuyêka newe awan bikerê" de xebatanê xo dewam kenê û do 7ê teşrîna peyêne Êlihî de şahîyêk organîze bikero. Endama Meclîsê Ciwanê HDPyî ya Gulîstan Yilmaz, wina vat: “7ê teşrîna peyêne de ma bendeyê heme ciwanan ke bi rêxistinbîyayîşê xo polîtîkayê şerî yê taybetî rê bibê cewab."

 

Meclîsê Ciwanan ê Partîya Demokratîke ya Şaran (HDP), 10ê êlule de startê kampanyaya xo ya "Ma tîryakî biteriknê, cuyêke newe awan bikerê" dabi. Meclisê Ciwanan bi nê kampanya hedef keno ke bale biancê serê xebutnayîşê tîryakî û vilabîyayîşê fihûşî yê herême. Çarçewaya na kampanya de ciwanî bername û kampanyayê tewir bi tewir kenê. Nika zî ciwanan çarçewaya xebatê kampanyaya xo de do 7ê teşrîna peyêne de Êlih de şahîyêk organîze bikerê. Derheqê endama Meclîsê Ciwanê HDPyî de Gulîstan Yilmaz qisey kerd.

 

Ciwan do tu wext semedê polîtîkayê şerî yê taybetî sere nêtewênê

 

Gulîstane destpêkê xo de bale ant serê polîtîkayê şerî yê taybet û vatî: “Desteştiş, şîdet û hêrişê ke hemverê cinîyan yenê kerdiş, problemêk unîversal o. Bêguman ê hêrişî vera cinîyanê ciwanan yenê kerdiş. Îqtîdar, bi vatişê cinsperest, bi medyayê ke hişmendîyê serdestîyê camêrdan mîyanê xo de hewêneno, semedê cinîyê ciwanan modelêk bindestî xêz keno. Faşîzmo ke xo bi tifaqê AKP-MHP dayo meşrûkerdiş, her ke şino serê ciwanan û serê cinîyê ciwanan de bi metodêk bîn  nîşan dano. Ma prosesêk tarîxî de yê ke ganî pêro wareyê komelî nê rê bibê cewab. Ma sey cinîyê ciwanî yê kurdî ke tarîx ra heta nika binê hedefê qirkerdişî de bî, la tu wext ma sere nêtêwênayo. Ma eşkenê vajê ke na xeta xoverdayîşî de cinîyê kurdî zî laver şîyê."

 

'Ma do merasimêk semedê xelatdayîşê musabaqa bikerê' 

 

Gulîstane bale ant serê xebatê çarçewaya kampanya zî û vat: "Muracatê semedê musabaqaya “cinîyê ciwanî yê hemverê fihûş û tiryakî yê" 30ê teşrîna verêne de Êlîh de zî merasîmêk seba xelatgirewtişî bikerê. Amancê ma oyo ke bi musabaqa pandemî de cinîyê ciwanî reng û şiklê xonîşan bidê. Coka ma hetê hunerî de organîze kerd. Resim û şîîrê ke semedê musabaqa ma rê ameyî şawitiş, hemverê polîtîkayê şerî yê taybetî bî.”

 

Ma 7ê teşrîna peyêne pabeyê şima yê

 

Gulîstane qiseykerdişê xo wina qedêna: "Her çiqas bi polîtîkayê taybetî serê ma de bêrê û mîyanê  hewildayîşê seba ke têkoşînê ma bipelçiqnê zî ma do fek têkoşînê xo ra vera nêdê. 7ê teşrîna peyêne de ma pabeyê heme ciwanan ê ke bi rêxistinbîyayîşê xo polîtîkayê şerî yê taybetî rê bibê cewab."