AMED - Arjîn Yuksekbag ke zîndanê Cinîyan ê Sîncanî de manenê, TUAY-DERî rê mektubêke şawit û dîyar kerd ke ê bawerê ke do veng bidê vengê înan û vengdayîşê hîsgêrî kerd.

 

Tecrîdê serê Rayberê PKKyî Abdullah Ocalanî tesîr serê heme zîndanan keno û tepişteyî her roje bi binpaykerdişêk newe dir yenê rî bi rî.  Binpaykerdişê heqan yê zîndanê cinîyan ê Sîncanî bi hemkarîya keye û tepişteyan her tim yeno rojeve. Tepişteya bi nameyê Arjîn Yuksekbag ke zîndanê Sîncanî ra 29ê êlule de mektubêke şawit Komeleya Paştdayîşê Hetkarîya Keyeyê bi Tepişteyan ê Sêrtî dir (TUAY-DER) û rojêke verê mektube resa komele.

 

'Bi bahaneyê pandemî astengî'

 

Arjîne mektube de wina vat: “Problemê bîyayeyê newe zêde bî.  Bi bahaneyê pandemî nînan danê vernî. Bi hîrê serrî yo odayî nêameyê vurnayîş. Pêwa heqê ma yê sereyîn nînê kerdiş. Pêwa ma muracatê xeylêk ca kerd anêgêrayî.  Seke yeno zanayîş, waştişê vurnayîşê odayan goreyê rewşa tepişteyan yeno kerdiş. Pêwa ke ma sebebê xo vanê zî yenê redkerdiş. Tepişteyê ke sucê bînan ra tepişyayê, odayê înan her wext yenê vurnayîş. No het ra bêtêduştîyêk pîl esto."

 

'Înfaz bi hawayêke kêfî yeno veşnayîş' 

 

Arjîne bale nat serê veşnayîşê înfazan û vat: "Tepişteyê ke ganî bêrê tehlîyekerdiş, bi mengan o yenê tepiştiş. Dîsîplînê bi kêfî yenê kerdiş. Tewr peyîn semedo ke ma deyîran vat û govende kerd, cipersayîşê dîsîplînê ame kerdiş. Hem cezaya pêvînayîşî hem yê neqlî ame dayîş. Eke nê cipersayîşî bêrê tesdîqkerdiş, tahlîye zî 4-5 mengan yenê ereyvistiş. Heqê ma yê weşîye yena astengkerdiş. Sey nimûneyê doktorê revîrî, koxuşê cîya de 3 yan zî 5 kesî eynî beşî sewq biwazê, bi hawayêke kêfî nê nêkenê. Şîyayîş û ameyîşê nêweşxaneyan de ma semedê nêzdîbîyayîşê leşkeran qebûl nêkenê, na rey cipersayîş kenê. Demo nêzdî de hîrê embazê ma bi nê caardişan dir ameyî rî bi rî."

 

Arjîne dewam de wina vat: "Koxuşê ma rewşêke problemê cidî yê weşîye peyda bikerê de yê. Pêwa nê şertê ma tewr zêde giran kenê. Koxuşa ke ez te de ya hîrê serrî yo ci de ya, rutubetêk pîl esto. Xêrcê tuwalet û banyo dêsê oda heme şilê. Her tim boyaxê ci yeno warî. Embazê ma yê nêweşê astimî estê. Tesîrêk pîl serê înan de beno. Ma muracat kerd, gerre kerd. Hewteyêk verê tadîlatêk dest pêkerd. La no  tadîlat koxuşê katê serê ma yeno kerdiş. Embazê ma yê uca bi nê bahaneyî berdî cayêk bîn. Vatî do mengêke dewam bikero."

 

'Mektubê ma yenê vînîkerdiş' 

 

Arjine dewam de wina vat: "Pêwa prosesê normalbîyayîşî, aktîvîteyê ma yê resim, sohbet û sporî hema qedexe yê. Dimayê hewldayîşê ma vatî do spor dest pêkeno. La o zî aşmêk reyke yo. Îmkanê ma yê girewtişê xeberan çin o. Bi kêfî yeno sînorkerdiş. Tewr peyîn Rojnameyê Evrensel dayî. Mektubanê ma bi kêfî ya erey şawenê, yan zî qet nêdenê. Derheqê ke pêvînayîşê ma yê telefon semedo ke bi kewo qeydan, qerar ame girewtiş û ame bi caardiş. Sewbîna ma kewtî grevê vêşanî xeylêk embazan rê dewa ame akerdiş. Wazenê heqê ma yê tewr xozayî îlegalîze bikerê, bi endamîya rêxistine girê bidê û ceza bidê."

 

'Ez serê nameyê 60 cinî nusena'

 

Arjîne vat, serê nameyê 60 tepişteyê cinî nuşte û wina vat: "Waştişê ma yê sewqî verê çiman de nîno girewtiş. Nimûne 5 serrî yo wazena ke mi sewqê zîndanêk nêzdîyê keyeyê mi bikerê. La nîno qebulkerdiş. Sebeb zî pandemî yan zî pirkerdişê zîndanî yo. La tepişteyê sucê cîya sewq kenê. Ma bi her hawayî rastê cîyabîyayîşî yenê. Hema xeylêk problem û astengîyê bîn estê. Ez nê çîyan serê nameyê xo de ney, ser nameyê 60 cinî nusena. Ez zana ke şima do bibo vengê ma û kîşte ma de bê. Ma her het de paştdayîşê şima hîs kenê."