AMED - Dayîka Sedat Baygeldî, Şukrane dîyar kerd ke zîndan bîyê sey îşkencexane û vat: "Tewr peyîn eştê serê koxûşan, waştê ke wareyêk veng bikerê û tepişteyê edlî uca de bi ca bikerê. No çi semedê tepişteyanê ma tehluke yo û ez  rewşa lajê xo ra bi endîşeyîn a."

 

Binpaykerdişê heqê tepişteyan her ke şino zêde beno. Sazgeh û rêxistinê sivîlî bi eşkerayîyan bale ancenê serê rewşa zîndanan. Keye zî bi eşkerayîyan vengdayîşê hîsgêrî kenê. Nê keyan ra yew zî keyeyê Sedat Baygeldî yo. Sedat serra 2013in de ame tepiştiş û Amed ra surgunê Zîndanê Tîpê H yê Dîlokî ameyo kerdiş. Dayîka Sedat, Şukran Baygeldî, rewşa tepişteyan ra endîşeyîn a û vengdayîşê hîsgêrî kena.

 

'Tepişteyê edlî do tîya bi ca bikerê'

 

Şukrane, dîyar kerd ke Zîndanê Dîlokî rewşa tepişteyan baş nîyo û vat: "Ez rewşa lajê xo ra xeylêk bi endîşeyîn a. Lajê mi 7 serrî yo zîndanê Dîlokî de tepişte yo. 54 serrî ceza dayî lajê mi. Tewr peyîn telefon de lajê mi qalê sereştişê qawîşan kerd û vat, 'Verê ma de wareyêk ame vengkerdiş û wazenê tepişteyê edlî tîya de bi ca bikerê.' Ez na rewşe ra xeylêk bi endîşeyîn a. Ez nêzana do çi bêro sereyê mi."

 

'Têkilîyê tepişteyan visnenê'

 

Şukrane wina vat: "Nê visnayîşê têkiliyê tepişteyan, yeno manaya tecrîdî. Ma wazenê pêvînayîşê akerde bêro kerdiş. Bi di serrî yo lajê xo nêvînena. Bi bahaneyê pandemî tepişteyanê ma, ma ra dûr fînenê. Têkiliyê tepişteyan hem yewbînan ra hem zî teber ra ameyo visnayîş. Hemverê tutanê ma de  tecrîdêk esto. Dest dayî serê kitab û mektubanê înan. Sewbîna cil û belgê ke ma şawenê, nêdanê tepişteyan. Xora tena 10 deqe heqê qiseykerdişî yê bi telefonî esto."

 

'Zîndan bîyê sey îşkencexaneyan' 

 

Şukrane tewr peyîn wina vat: "Xora verê zî zulm bi la nika sewîyeya zulmî zêde kerdê. Zîndanan de îşkenceyo sîstematîk yeno kerdiş. Ma dayîkî tena aştî û edalet wazenê. Her çiqas nêweş bî zî ez o dimayê lajê xo şêrî. Ez o vera zulmî semedê lajê xo şêrî her ca. Tena waştişêk mi esto û no zî aştîye yo."