STENBOL- Avûkata Destîna Yildiz dîyar kerd ke binpaykerdişê heqan ê zîndanan zêde bîyo û ganî hemverê nê rayaumumî bêveng nêmano û vat: "Semedê caardişê zîndanan nêbenê rojeve, nînê vînayîş, dewam kenê."

 

Tecrîdê serê Rayberê PKKyî Abdullah Ocalanî tesîr serê her hetê cuye û bi taybetî zîndanan keno. Îqtîdar ke pandemî kerd sebeb tecrîd roj bi roje giran kerd, şîdet, îşkence, cezayê dîsîplînî, qedexekerdişê pêvînayîşî bi ca yenê. Heto bîn ra zî yê ke tewr zêde tesîr benê tepişteyê nêweşê.

 

3 mengan de hezar û 761 binpay kerdê

 

Komeleya Heqê Merdiman (ÎHD) yê Stenbolî hewteyê vîyarte de raporê ‘Binpaykerdişê heqan ê zîndanî herêma marmarayî’ eşkera kerd û dîyar kerdî ke hîrê mengan de hezar û 761 muracatê binpaykerdişê heqan girewtê. Rapor de bale antî serê tecrîdê Îmraliyî û rewşa tepişteyê nêweş. Avûkate Destîna Yidiz ajansê ma de ercnayîş kerd.

 

'Tecrîd û binpaykerdişê heqan zêde bi' 

 

Destîna bale nat serê tedayan û vat: "Pêvînayîşê bi tepişteyan dir gardîyanî vanê, cilanê xo vejê la seba nêvejenê yenê derbkerdiş. Xeylêk zîndanê Tirkîya de cigêrayîşê viran û fekî, sewbîna xeylêk binpaykerdişê bînî yenê ciwîyayîş. Bi pandemî dir tecrîd giran bi. Teber de pêwa ke cuye  normal bîya, zîndanan de pandemî dewam keno. Tepişteyî nêeşkenê heqê xo bixebitnê. Bi di serrî yo nêeşkenê pêvînayîşê akerde bikerê. Nêeşkenê spor bikerê. Mektube û kitaban erey danê. Mektubê Kurdkî yenê sansurkerdiş.”

 

'Zîndanê tîpê S de tecrîdo giran babeta vatişî ya'

 

Destîna dewam de wina vat: "Zîndanê Tîpê S de tecrîdo giran babeta vatişî ya. Tecrîdê Tîpê F ra wetayêr tecrîdêk babeta vatişî ya. Semedo ke hewadankê hucreyan çin o, tepişteyan benê cayêk bîn û saetêke hewa gênê. Zîndanê Tîpê S de no her wext derbazdar o. Hucreyî verê yewbînan de nîyê, pêser ameyê viraştiş. Prosesê bêro de do derheqê zîndanê Tîpê S de agahî vejîyê werte. Amancê tecrîdî oyo ke  kesî tena verdê."

 

Caardişê kêfî dewre de yê 

 

Destîna wina dewam kerd: "Kesê 30 serrî yo tepişteyê bi sebebê kêfî yê dewlete yenê tepiştiş. No binpaykerdişê heqan o. Bi hîsê heyfgirewtişî caardişê kêfî kenê. Îtîrazê hemverê qerarî verê çiman de nînê girewtiş. Mekanîzmayê dewlete qels manena. Semedê serdayîşê taloqkerdişê înfazî ATK rapor bido zî semedê mudaxaleyê şubeyê TEMî yenê astengkerdiş. ATKîqtîdar ra bi xoser qerar nêdano. Xeylêk nêweşî pêwa raporê înan ê nêeşkenê tepişte bimanê esto zî sazgehê tipê edlî vano eşkenê bimanê. Mehmet Emîn Ozkan nimûneyêk o."

 

'Ganî reaksîyon bêro ramojnayîş' 

 

Destîna tewr peyîn wina vat: "Qanûnê înfazê bîyaye de caardişê kêfî estê. Ganî teber de rayaumumî hemverê nê caardişan bêveng nêmano. Ganî caardişê zîndanan berê rojeve. Semedo ke nêbenê  rojeve û nînê vînayîş caardişî dewam kenê. Tecrîd komel de zî vila beno. Semedê vernîya nê bêro girewtiş, ganî her kes hîsgêr têbigeyero."