Derya Ren

 

RIHA - Endamê Meclîsê Dayîkê Aştîye semedê yewin roniştişê dewaya derheqê Emîne Şenyaşar ke roja 86ine de Nobeta Edaletî de ardibi ziwan amebî akerdiş de vengdayîşê tewrbîyayîşî kerdî. Dayîkan dîyar kerdî ke  gelo do bi kam ci rî dayîka Emîne ra pers bikerê, do senîn muhakeme bikerê.

 

Qezaya Pirsûsî ya Rihayî de vernîya weçînayîşê 24ê Hezîrana 2018 de merdimê parlamenterê AKPyî Îbrahîm Yildiz û pawitoxê ey hêrişê keyeyê Şenyaşarî kerdibî. Emîne Şenyaşar ke di lajê xo û mêrdeyê xo vînî kerd, 2yîn Dadgeha Cezaya Asliyeya Rihayî de bi îdiayê heqaret wezîfedarê selahîyetdaran kerda dewa akerd. Bahaneyê dewa zî vatişê ci yê 9ê Adare de 86ine roja Nobeta edaletî de ardê ziwan, ame ramojnayîş. Roniştişê yewin do  2yîn Dadgeha Cezaya Giran ya Rihayî de bêro vînayîş.

 

9ê Adare ra heta nika bi hezaran kesî bi amancê paştdayîşê Emîne ameyî verê edliyeyê Rihayî. Xeylê xo dayîkî bî û reyke bîn zî ame vînayîş ke nê welatî de tewr zêde dayîkî edalet wazenê.

 

Dayîkan semedê roniştişê Emîneye semedê tewrbîyayîşî veng dayî.

 

'Wax nê edaletî rê'

 

Endama Meclîsê Dayîkê Aştîye ya Geverî Gule Polat wina vat: "Gelo no edalet o, no merdimayî yo? Emîne vana ke ‘kiştoxê tutanê mi bivînê. Dima ra mi muhakeme bikerê.' Ma sey dayîkî her wext kîşte Emîne de yê. Ma her roje vanê ma wayê û bira yê. Ez meraq kena gelo dadgehe do bi kam ci rî Emîne ra pers bikero. Yê ke aye muhakeme kenê, wa vernê de bêdadî sererast bikerê. Wax nê edaletî rê. Qalê kam ci edaletî kenê. Ez veng dana hemine ke siba tewrê roniştişî bibê."

 

'Emîne êdî dayîka ma hemine ya' 

 

Endama Meclîsê Dayîkê Aştîye ya Wanî Perîhan Aslan wina vat: "Sere de Emîne, ma do kîşte heme kesê ke edalet gêrenê de bê. Emîne êdî dayîka ma her kesî ya. Zîhniyeto ke dewa Emîne rê akerdo, zîhnîyetêk senîn o. Roja 88ine Nobeta Edeletî de Emîne temelê awanîya semedê edliye ameyîne viraştiş bi destê xo kola. A roje kezeba mi parçe bî. Yê ke dewa ci rê akerdî wîjdanê înan senîn o. Ganî roja îne her kes verê Edliyeyê Rihayî de bo. Semedê Emîne kurd a nê zulmî kenê. Çira goş nêdanê vatişê ci. Tutê ci verê çimanê hemine de ameyî qetilkerdiş. Kesî veng nêvet. Ganî heme dayîkî roja îne roniştiş de ca bigîrê."

 

'Bêedaletî her ca de yo'  

 

Endama Dayîkê Aştîye ya Êlihî Fatma Tatli zî veng da û vat: “Emîne bi mengan o verê edliye de çalakîya edaletî dewam kena. Her reya ke ma aye vînenê kezeba ma veşêna. Ma dayîkî wazenê êdî edalet bê ro no welatî. Ez veng dama heme kesî ke roja îne edlîye de bê. Bêhuqûqî her ca de dewam keno."