Sema Çaglak

 

AMED - Rexistinê HDPyî yê Amedî do 3in Kongreya xo ya Asayî bi sloganê, “Ma do bi hêzê xo yê rêxistinkerde tecrîd bişikênê, demokrasîyêk azad  awan bikerê" organîze bikerê. Cinîyê sîyasetmedar dîyar kerdî ke pêvînayîşê semedê kongreyê moral û motîvasyonêk baş danê û dîyar kerdî ke ê do bi hêzê xo yê rêxistinkerde serdemê newe de prosesî rê bibê cewab.

 

Rêxistinê Partîya Demokratîke ya Şaran (HDP) a bajarê Amedî do 14 teşrîna peyêne 3in Kongreya xo ya Asayî bi sloganê, "Ma do bi hêzê xo yê rêxistinkerde tecrîdî bişikinê, demokrasîyêk azad awan bikerê." Derheqê kongreyê cinîyê sîyasetmedarî qisey kerdî.

 

Hemşaredara Yenîşehîrî Belgîn Dîken ke qeyûm tayînî vera ci amebi kerdiş, dîyar kerd ke xebatê kongre dewam kenê û çarçewaya xebatan de ê îdarekarîyêk xurt amanc kenê. Belgîne wina vat: "Ma startê xebatê xo yê semedê kongre 25ê Êlule de da û a roje ra nat, ma xebatanê xo bêmabên dewam kenê. Çarçewaya xebatanê kongreyî de bi sazgehê sivîl û bi şarî dir pêvînayîşî yenê kerdiş. Hem hetê pêroyî ra û hem zî  bi taybetî xebatê ma yê semedê cinîyan dewam kenê. Na çarçewa da serdayîşê qeza û taxan yenê kerdiş. Bi şarî dir, bi cinîyan dir pêvînayîş ame kerdiş û pêşnîyazî ameyî girewtiş. Goreyê pêşnîyazan do îdarekarîyêk xurt bêro awankerdiş."

 

'Cinî bi hêzêke têkoşer tewrê xebatan benê' 

 

Belgîne bale ant serê tevgerê cinîyan û vat: "Bi nêzî 150 cinîyan dir bi hawayêke resen ma xebityayî. Ê pêvînayîşan de bi teybetî serê babetê tecrîd, têkoşînê cinîyan û serê heqê cinîyan de ma vindertî. Sewbîna serê ekolojî zî ercnayîş ameyî kerdiş û xeylêk fikr û fehmê pozîtîf vejîyayî werte. Nê xebatan de wayîrvejîyayîşêk bi mana vejîya. No zî ramojna paştdayîşê xebatê ma bi hêz dewam bikero."

 

'Pêvînayîşê ma moral û motîvasyonêk baş da'

 

Endama Meclîsê Cinîyan ê HDPyî Yasemîn Uçar qisey kerd û vat: "HDPyî deklarasyonê xo yê ke 11 madeyan bi ca ameyîne eşkera kerdibi. Na çarçewa de semedo ke ma fikrê deklarasyonî bidê xurtkerdiş, ma na kongre viraznenê. Eynî wextî de amancêk ma yê bîn zî şikinayîşê tecrîdê serê şaran o. Semedo ke yeno vînayîş ke tecrîdê serê şaran her ke şino kûr beno û pêro wareyê cuye de xo ramojneno. Xebatê ma yê semedê kongre dewam dewam kenê. Ma hem bi şarî dir kombîyayîş kerd û hem zî ma bi sazgehê komelê sivîlî dir pêvînayîş kerd. Na kongre esasê xo de wayîrvejîyayîşê şarî ya. Na çarçewa de ma nêzdîyê 400 kesan dir pêvînayîş kerd û her beşek de pêşnîyazîyêk semedê namzetê îdarekerdişî ameyî ramojnayîş. Ma zî na çarçewa de goreyê waştişê şarê Amedî îdarekarê xo weçînê û îdarekarîyêk tewr xurt bikerê."

 

'Ma do proses rê bibê cewab'

 

Yasemîne tewr peyîn wina vat: "Sey yeno zanayîş, sîyasetêk ma yê kan û mîrasêk têkoşînî esto. Ma wazenê nê laver berê û bi paştdayîşê şarî dir prosesî rê bibê cewab. Coka 14ê teşrîna peyêne de bi beşdarbîyayîşê Hemsereka Pêroyî ya HDPyî Pervîn Buldan, parlementerê ma û bi delegeyanê ma Kaplan Ctyî de kongereya xo ma do bikerê. A roje ma pabeyê ke şarê ma tewrbîyayîşêk xurt bikero û bi hêzê xo yê rêxistinkerde serdemêk newe bêro destpêkerdiş.”