COLEMÊRG - Cinîyê taxa Bîçerî dîyar kerdî ke di rojan ra reyke awe yena dayîş û awa ke yena zî sey lince ya. Xeylêk pê nêweşî kewtê. Cinîyan vatî, ganî no problem bêro safîkerdiş.

 

Dimayê ke qeyûm tayînê şaredarîyê HDPyî ameyî kerdiş, nêewnayîş û nêdayîşê xizmetî ame rojeve. Colemêrg de zî bi tayînkerdişê qeyûman dir xizmet ame vindernayîş. 11ê êlule 2016 de qeyûm tayînê şaredarîyan ame kerdiş û bi weçînayîşê 2019 dir zî dimayê demêk 18ê teşrîna peyêne 2019 de reyke bîn qeyûm ameyî tayînkerdiş. Colemêrg de dimayê tayînkerdişê qeyûman yew problemê ke yenê ciwîyayîş zî awe ya. Taxa Bîçer 4 serrî problemê awe yeno ciwîyayîş. Roje ra di rey awe yena dayîş û  di saetan eşkena bêro xebitnayîş. Welatiyan pêwa ke waştişname dayî şaredarî zî netîceyêk nêgirewtî. Cinîyan dîyar kerdî ke awa ke yena dayîş merdim nêeşkeno bişimino.

 

'Awe lêşin a'

 

Cinîya bi nameyê Edîbe Akgul dîyar kerd ke bi serran o problemê awe ciwîyenê û vat: "Colemêrg de awa  Berçelan esta û na awe dayê taburê leşkeran. Awa lêşin zî danê ma. Roje ra reyke awe danê. A zî saetêke ya. Ma nêeşkenê çîyêk bikerê. Ma nêeşkenê karê xo bikerê, cil û firaqanê xo bişoyê. Yê ke wesayîtê înan estê şinê girê Sumbulî ra awe anê. La ê bînî awa lêşine xebitnenê. Awa lêşine bena sebebê nêweşîyan. Wexto ke ma şinê doktor, ma pers kenê vanê awe ra yo. Ma wazenê awe ma tim bibo."

 

'Ma nêweş kewenê' 

 

Sevda Tosun ê 11 serrî taxa Bîçer de nişnena ro û vat: "Merdimî semedê awa lêşin her wext nêweş kewenê. Ma çend rey şî verê selahîyetdaran. La ma goşdarî nêkerdî. Ma vanê problemê awe esto, vanê depoyê awe bigîrê. Îmkan bibayîne xora ma girewtêne. Roja ke awe yena ma tena cilan şonê. Zanayîşê camêrdan zehmetîyê k ema ancenê ra çin ê. Serê sibayî şinê, şan de yenê. Bar heme serê milê cinîyan de yo. Ma wazenê ke awa ma tim bidê. Semedê awe ma nêweş kewenê."

 

'Awe sey lince ya' 

 

Cinîya bi nameyê Fatma Akbogan zî wina vat: "Awa ke danê ma nêeşkenê tu karê xo bikerê. Semedê awe nîna dayîş di rojî ma pakitî nêkerda. Ma mexdur ê. Saetêke vera danê û dima ra gênê. Nêverdenê ma karê xo bikerê. Bi bîdonê pîlan ma awe gênê û aye zî qîm nêkena. Awa ke yena sey lince ya. Ma nêeşkenê biwerê û bikerê werd. Wa êdî no prblem bêro safîkerdiş."