Medya Uren

 

MÊRDÎN - Amedekarîyê zimistanî bi viraştişê şerbetê hinaran dir  temam kerdî. Viraştişê şerbetê hinaran prosesê zehmetî ra derbaz beno. Adîle Aksoy ke no proses ramojna wina vat: "Rexmê pêro zehmetîyan ma mîyanê amadekarîya zimistanî de bi hemkarîyêk pîl xebityenê û no zî ma kêfweş keno."

 

Mêrdîn de her serre peynîya şerbetê  hinaran dir amadekarîyê zimistanî yenê temamkerdiş. Cinî seba hetkarîya ekonomî û rengdayîşê sifreyê zimistanî hinaran arêdayî kenê şerbet. La viraştişê ci zehmet o.

 

Tewr peyîn zî hinar yenê guwaştiş, awa înan yena vetiş û bi adirê daran yeno girnayîş. Heta ke awe tîr bena, adirê ci yeno geşkerdiş. Tewr peyîn zî awa hinaran bena şîregerm û kenê bîdonan. Semedo ke na awe tay vejêna keyeyî semedê tîcaretî xebitnenê. Tewr zêde semedê keyeyî yena viraştiş. Zimistan de zî sey şerbeto tewr bi erc cayê xo sofreyan de gêno."

 

'Bar tewr zêde serê milê cinîyan de yo'  

 

Sere de bi taybetî cinî zîyanê hinaran de amadekarîyê xo kenê.  Hinaran kom kenê, yê xirab û yê baş yewbînan ra cîya kenê. Yê ke xirab bîyê zî semedo ke bibê gubre binê qurmê daran de kom kenê. Dima yê ke pêro hinarî ameyî arêdayîş, dorê werdikerdişê înan yeno. Semedê nê prosesî zî cîranî kom benê û hetkarîya yewbînan kenê. Adîle Aksoy ke proses qal kena wina vat: "Hinarê ma emsar baş nêbî. Vajê nîmeyê înan weş nêbî û ma înan eştî. Hûmarêke baş zî yê mendê nêvejênê. Xora heta ke ma pîl kenê zî ma zehmetîyêk pîl vînenê. No bar tewr zêde serê milê ma cinîyan de maneno."

 

'Ma bi hemkarî kar kenê' 

 

Adîle tewr peyîn wina vat: "Tewr baş oyo ke ma pîya hemkarî kenê. Ma heme sey şewbihêrkan kom benê. Cîran û merdimî yenê têhet. Ma pîya xebityenê yê ke nêxebetênê zî dorê ma de kom benê û bi hîkayeyan dir beşdarê ma benê. Xeylêk rey ma zehmetîyan ancenê zî xo vîr ra kenê. Lazim o ke ma kulturê xo zî vînî nêkerê. No sey mîrasêkê yo û ma pîya dano girêdayîş. Torra ma, komel û cinîyan xurt kena."