STENBOL- Lîseyê Anadolu yê Merkezê Cizîrî de hetkarê Mudûrî Burak Ercan xeylêk tutan hêrişê cinsî kerdibi û ame zanayîş ke hema wezîfeyê xo dewam keno. Sekreterê şubeyê Hûmara 7 ê Egîtîm Senî Gamze Yildirim dîyar kerd ke gumanbar hîna xebityeno û bi nê zî hêrişê cinsî yeno meşrûkerdiş.

 

Qezaya Cizîrî ya Şirnexî vejîyabi werte ke temsîlkarê Egîtîm Bîrsenî yê Lîseyê Anadolu yê Merkezî hetkarê mudurî bi, 40 ra zêdeyêr tutan rê hêrişê cinsî kerdo. Muhakemekerdişê gumanbarî hîrê serrî û nîm dima rojê vîyarte de ame kerdiş û prosesê derbazbîyayîşî de tu çîyêk nêame kerdiş. Mamosteyo gumanbar eksê ci tayînê wendegehêk bîn yê Stenbolî ame kerdiş. Keye û kedkarê perwerdeyî îtîraz kerdibi la pêwa nê gûmanbar Burak Ercan hema nêameyo tepiştiş.

 

Wezîfeyê xo dewam keno

 

Hukm gumanbar nêtepişneno û selahîyetdarî zî vera ke gumanbar Burak Ercan bigirî vernê de tayînê Wendegehê Mîyanên ê Orhangazî kerdî û nika wezîfeyê xo dewam keno.

 

'Îstîsmar yeno meşrûkerdiş'

 

Sekretera Şubeyê Hûmara 7in Egîtîm Senî Gamze Yildirim dîyar kerd ke prosesê Stenbolî nêzdî ra taqîb kenê û vat: "Gumanbar hema xebityeno û no hemkarîya sucê hêrişê cinsî yo. Wezaret ganî prosesê edlî de hetê tutan de bo.  Tu bahaneyê hêrişê cinsî yê hemverê tutan çin o. Semedê nê zî nêtepiştişê gumanbarî tu bahaneyê ci yê huqûqî çin o. Prosesê dewa dewam keno, gumanbar hema zî serê wezîfe de yo û hêrişê cinsî meşrû keno.

 

'Bêbawerîya sazgehê perwerdeyî vejêno werte' 

 

Gamze dewam de wina vat: "Sazgehê perwerdî de nimitişê hêrişê cinsî, rayîr ver bi bêbawerî rê akeno. Rewşa bêasayîşî zêde keno. Heta qanûnê ke cinî û tutan pawenê bi tesîr bi ca nêrê, tedbîrî nêrê girewtiş, gumanbarî nêrê cezakerdiş, semedê tutan hawirêk bi asayîş nêeşkeno bêro awankerdiş."

 

'Ma nêzanê kam ci sazgehî de xebityeno' 

 

Gamze vat, Meclîsê Cinîyan ê KESKî yê Stenbolî taqîbkerdoxê serebûtîyê û vat: "Ma kewtî mîyanê tevgerî, ma keye û mamosteyan ra vat û dima ra bi Mudurîyê Perwerdeyî dir pêvînayîş kerd. Mudurîyê Perwerde vat, do Burak Ercan peyser bigîrê xizmet. Dima ra musayî ke pêwa kadroyê ci Wendegehê Mîyanên ê Orhangazî heto zî uca nêxebityeno. Ma Mudurîyê Perwerdeyî yê Sultangazî ra musayî ke dima ra girewtê xizmet. La ma vera nêyê û vanê heta dewa netîce nêbo wa kar ra bêro girewtiş. Çi heyf nika Burak Ercan xebityeno. Çi heyf ma nêzanê ke ça de xebityeno zî."

 

Çîyêk gerek vera hêrişê cinsî bêro kerdiş

 

Gamze wina vat: "Bawerîya ma ya bi mekanîzmayê edeletî her ke şino kêm beno. Qerarê hukmî mexdurbîyayîş tewr giran keno. Semedê vernîgirewtişê hêrişê cinsî ganî tutî emrê qij de bibê wayîrê zanayîşî. Wendegehan de ganî dersê hîra yê cinsî bêrê dayîş. Ganî bizanê ê tena serê bedenê xo de biheq ê."

 

'Ganî tevgerê tutan bêrê taqîbkerdiş' 

 

Gamze tewr peyîn wina qal kerd: "Ganî tevgerê tutan bêrê taqîbkerdiş. Dimayê ke hêrişê cinsî bêro tespîtkerdiş, ganî zaf baldar nêzdîyê tutan bibê û sewîyeya sucdarî ra dûr bikewê. Nê nêzdîbîyayîşê hemverê tutan, bi têkoşînê cinîyan eşkeno bêro tasfiyekerdiş.”