ŞIRNEX - Aktîvîsta TJAyî Zozan Aksû, derheqê plansazîyê çalakîyê ke do çarçewaya 25ê Teşrîna Peyêne organîze bikerê de qisey kerd û dîyar kerd ke bi girankerdişê tecrîdî dir hêrişê serê cinîyan zêde bîyo û vat: "Wa pêro cinî dest bidê destê yewbînan û wayîrê nasnameyê xo vejîyê. Ma do tu wext bêveng nêmanê. Ma do emsar zî 25ê Teşrîna Peyêne de meydanan de bê."

 

Bi minasebetê 25ê teşrîna peyêne Roja Têkoşînê Hemverê Şîdetê Serê Cinîyan ê Dinya, sey her serre cinî do emsar zî meydanan de bê û vengdayîşê têkoşîn û têduştî bikerê. Meclîsê Cinîyê Partîya Demokratîke ya Şaran (HDP) û Tevgerê Cinîyê Azadî (TJA)  zî Botan de dimayê ke startê çalakîyê xo 13ê teşrîna peyêne de dayî dest bi xebatê xo yê seba çalakîyê ke do çarçewaya 25ê teşrîna peyêne de organîze bikerê û dewe bi dewe, tax bi taxe û kuçe bi kuçe gêrenê û xo resnenê cinîyan.

 

Derheqê roje û plansaziyê 25ê teşrîna peyêne de aktîvîsta TJAyî Zozan Aksû qisey kerd.

 

'Ma bêveng nêmanenêû ma do meydanan de bê'  

 

Zozane, bale ant serê giringîyê roje û wina vat: "A roje semedê ma xeylêk girîng a. Semedo ke hemverê tacîz, tecawuz, şîdet û qirkerdişî vera cinîyan ma do wareyan de waştişê xo û nêrazîbîyayîşê xo bîyarê ziwan. Ma tena 25ê Teşrîna Peyêne ma do her roje wareyan de bê. Labelê taybetmendîyêk a roje esta ke a roje ra Têkoşînê Hemverê Şîdetê Serê Cinîyan o. Demê peyîn de hemverê cinîyan tacîz, tecawuz û hêriş xeylêk zêde bîyo. Nê hêrişî bi taybetî zî herema ma de zêde bîyo. Hemverê nê hêrişan ma bêveng nêmanê û ma do meydanan de bê.”

 

Plansazîyê xo amade kerdê

 

Zozane dîyar kerd ke her serre zî plansazîyê înan ê 25ê teşrîna peyêne esto û wina vat: "Bi nê bernameyan ma do xo biresnê bi seyan cinîyan. Ma cinî têkoşînê xo pîl kenê. Startê çalakîyê 25ê teşrîna peyêne yê Botanî 13ê menge Şirnax de ame dayîş û fînalê ci zî qezaya Şirnexî Sîlopî de bêro kerdiş. Ma estê û ma her ca de yê. Cinîyan tim rayberîya komelî kerdo. Ê çiqasî bi serê ma de bêrê û hêrişê ma bikerê zî  ma do tu wext game nêerzê. Ma do her wext meydanan de bê û wayîrê nasnameyê xo vejîyê. Ma do bibê vengê cinî û tutê ke desteşrişî, tecawuz û şîdet yeno kerdiş. Ma wazenê ke heme cinîyê dinya dest bidê yewbînan û bibê yew. Ma do  nasnameyê cinîyan bipawê ke semedo komel binê tecrîdî ra bivejîyo.”

 

'Sebebê hêrişê serê cinîyan tecrîd o'

 

Zozane, dîyar kerd ke sebebê zêdebîyayîşê nê hêrişan tecrîdo girankerde yê serê Rayberê PKKyî Abdullah Ocalanî yo û wina qedêna: "Beno ke no tecrîd sey serê birêz Ocalanî de bêro vînayîş, labelê no tecrît eynî wextî de temamê welatî vila bîyo. No tecrît bi taybetî tesîr serê cinîyan keno û ma nê vînenê. Semedo ke nê hêrişê serê cinîyan peynî bibê, Ganî ma cinî nê tecrîdî peynî bikerê. Bêrê destê xo bidê yewbînan. Ma pîya têkoşînê xo pîl bikerê û wayîrê nasnameyê xo vejîyê."

 

Bernameyê 25ê Teşrîna Peyêne yê Meclîsê Cinîyan ê HDPyî û TJAyî wina yo:

 

“*13ê Teşrîna Peyêne: Merkezê Şirnexî startê 25ê Teşrîna Peyêne de ame dayîş.

 

*15ê Teşrîna Peyêne: Qezaya Qilebanî de panel ame kerdiş.

 

*17ê Teşrîna Peyêne: Elkê de fîlmê bi nameyê 'Berxwedan' do bêro temaşekerdiş. Cinîyê tepişteyan rê zî kart bêro şawitiş. 

 

*20ê Teşrîna Peyêne: Cizîr de çalakîya solan bêro kerdiş. (Nameyê cinîyê ke ameyê qetilkerdiş do bêrê wendiş)

 

*23ê Teşrîna Peyêne: Qezaya Hezexî de çalakîya zincîrê xemrî do bêro kerdiş.

 

*25ê Teşrîna Peyêne: Silopî de rayrayîşê fînalî do bêro kerdiş."