Gulîstan Şahîn 

 

QAMIŞLO - Çalakgerê ke tewrê çalakîya çadira Berê Sêmalka benê, dîyar kerdî ke ê fek israrê xo yê girewtişê cenazeyê tutanê xo vera nêdanê û heta cenaze bigîrî do bi hawayêke çalak tewrê çalakî bibê.

 

Menga tebaxe de herêma Xelîfanî ya Başurê Kurdistanî de dafikêke plankerde yê PDKyî de 5 şerwanê azadîye şehîd kerdî û şerwanêêk zî heta nika aqûbetê ci dîyar nîyo. Kesê ke ameyî şehîdkerdiş di ci ra rojawanê Kurdistanî ra yê. Bi waştişê teslîmkerdişê cenazeyê pakrewanan û şermezarkerdişê PDKyî semedê helwestê ci yê hemverê kurdan, bi rayberîya keyeyê Şehîdan û dayîkê aşitîye verê berê Sêmalka ke mabêne Vakur-Rojhelatê Sûrîye û Başurê Kurdistanî de çalakî ameye organîzkerdiş. Bi nêzdîyê 48 rojî yo Keyeyê şehîdan, roniştoxê herême, sazgehê komelê sivîl, Rêxistinê heqê merdiman û huqûqî, serdayîşê  çalakî kenê û paştdayîş danê na çalakîya bi rûmet. 

 

Kesê ke tewrê çalakîya roniştişî yê Berê Sêmalka bî, fikrê xo ajansê ma dir pare kerdî.

 

'Waştişê ma oyo ke cenazeyê tutanê ma teslîmê ma bikerê' 

 

Îdarekara Tevgerê Ciwan ê Kantonê Hesekî, Delal Biro amancê tewrbîyayîşê xo yê çalakî wina vat: "Bi hîrê rojî yo ma tewrê çalakîya iya Berê Sêmalka bÎ. Amancê çalakîya ma oyo ke ma cenazeyê tutanê xo yê ke bi destê PDKyî ameyê şehîdkerdiş, bigîrê. Heta nika zî hetê keyeyê Berzanî ra bêvengîyêk esto, la wa bizanê ma heta cenazeyê tutanê xo nêgîrê, ma nêvindenê. Heme roniştoxê herême, sazgeh û dezgehê herême paştdayîş danê çalakî. Ma pêwa varan û serdî zî dest çalakîya xo ra vera nêdanê. Heme dinya zana ke ma semedê girewtişê cenazeyê tutanê xo tîya yê. La heme dewletî beramberî kerdişê PDKyî bêveng ê. Bêrîtan (Gulnaz Karataş) zî bi destê PDKyî ameye şehîd kerdiş û ewro zî tutê ma bi destê înan yenê şehîdkerdiş. Eke ewro cenazeyê tutanê ma nêdanê. Semedo ke wazenê îxanetê înan nêro ispatkerdiş. Gonîya keyeyê Barzanî de îxanet esto. Waştişê ma oyo ke  cenazeyê tutanê ma teslîmê ma bikerê."

 

'Xoverdayîş de bi israr bê' 

 

Endama Yewîya Mamosteyê bajarê Hesekî, Bêrîvan Beşîr Îsmail vat tewrê çalakî bîya û wina dewam kerd: "Ma bajarê Hesekî ra ameyî û tewrê çadira xoverdayîşê pawitişê rûmetî bî. 47 roj zêdeyêr o ma çadira xoverdayîşî daya ro û ma sey mamoste tewrê çadire bî û ma bi na çalakîya xo keyeyê Berzanî şermezar kenê û kes nêeşkeno xoverdayîşê şarî vindarno. Ma merdimê perwerdekerde û wayîrê heqî yê. La keyeyê Berzanî cenazeyê tutanê ma girewtê nêdanê ma. Wexto ke babete bena kurdî heme dinya bêvengîya xo pawena.  Ma sey şarî heta peynî xoverdayîşê xo dewam bikerê. Ma kurd ê û kes nêeşkeno îradeyê ma bişikino û ma do xoverdayîşê xo de bi israr bê. Gonîya şehîdanê ma parçeyêk ma ra ya, ma do wayîrê şehîd, welat û herra xo vejîyê."

 

'Çimê ma ameyîşê cenazeyanê ma de yo'

 

Endama Komîteya Amadekar ya çadira çalakî û şewirmenda Kongreya Star Sabah Elî çalakî wina ercna: "47 rojî yo ma tîya çalakîya xo dewam kenê û 2 rey zî sey dayîkê aşitîye ma şî verê berê Sêmalka ke ma cenazeyê tutanê xo bigîrê, la derbaz nêkerdî. Ma a  çalakî de çend saete zêdeyêr rayîr pada û ma bi israr bî ke şêrê cenazeyê tutanê xo bigîrê. Heme kes serdayîşê çadirê çalakî keno û eşkerayîya xo dano. Dayîkê ke nêeşkenê cenazeyê tutanê xo bigîrê dej ancenê. Gerek PDKyî bi gul û çîçekan şehîdanê ma bidayîne ma, la wina nêkenê. Tîya de tena waştişêk ma esto, o zî cenazeyê tutanê ma yo. Ewro tutê ma herra başurê Kurdistanî de xo ver danê, ma zî sey şarî pey tutanê xo yê. Tutê ma semedê her çar parçeyê Kurdistanî şer kenê. Tutê ma Şengal ra bigîrê, heta Efrîn gonîya xo rijnayê, coka ma zî serê rayîrê înan de şêrê. Başur bigîre, heta Vakur paştdayîşê çalakîya ma ya çadire yena kerdiş. Waştişê ma oyo cenazeyê tutanê ma teslîmê ma bikerê û eke nêdê zî do çalakîya ma heta peynî dewam bikero."