STENBOL - Avûkatanê Rayberê PKKyî Abdullah Ocalanî yê ke bi serran o nêeşkenê muwekîlê xo bivînê, semedê pêvînayîşî reyna muracatê Serdozgerîya Komare ya Bursa û Mudurîyetê Zîndanê Îmraliyî kerdî.

 

Avûkatê Rayberê PKKyî Abdullah Ocalan û tepişteyî Omer Hayrî Konar, Hamîlî Yîldîrîm û Veysî Aktaş yê Zîndanê Asayîşê Berzî yê Tîpê F yê Îmraliyî de binê  şert û mercê giran yê tecrîde manenê, Faîk Ozgur Erol, Raziye Ozturk, Rêzan Sarica û Cengîz Yureklî semedê bi miwekîlê xo dir pêvînayîş bikerê, muracatê Serdozgerîya Komare ya Bûrsayî û Muduriyetê Zîndanê Îmraliyî kerdî.

 

Astengkerdişê pêvînayîşî

 

Serdozgerîya Komare ya Bûrsayî, bi bahaneyê Ocalanî serra 2009 de pawitişê bi nameyê "Xerîtaya Rayîrî" Dadgehê Heqê Merdiman ê  Ewropa (DMME) rê şawitib, 23ê Êlule 2020 de 6 mengî cezaya qedexeyî avûkatanê Abdullah Ocalanî rê birnabi. Pêwa cezaya qedexeyê avûkatan 23ê Adare de peynî bî zî reyna avûkatî nêeşkenê şêrê Îmraliyî û ne negatîf û ne pozîtîf cewab înan rê nîno dayene.

 

Avûkatanê Abdullah Ocalanî ra Rêzan Sarica û Newroz Uysal, dimayê 8 serrî mabêne 2-22ê Gulane, 12-18ê Hezirane û 7ê Gulana 2019 de şîbî Îmrali. 

 

Tewr peyîn 25ê Adare de pêvînayîş ame kerdiş 

 

Abdullah Ocalan 22 serrî yo Zîndanê Tîpê F yê Îmraliyî de tena 2 rey bi telefon keyeyî dir qisey kerd. Abdullah Ocalan ke 22 serrî yo tecrîd de yo, reya ewil 27ê Nîsana 2020 de tena 20 deqîqeyan bi telefon dir qisey kerd. Tewr peyîn serê îdeayê medyaya komelî de vila bî, dimayê reaksîyonê komelî 25ê Adara 2021 de Edliyeyê Rihayî de tena 4.5 deqîqeyan bi rayîrê telefonî birayê xo Mehmet Ocalanî dir qisey kerd û telefon nîme de amebê birnayene.