STENBOL - Avûkata femînîst Merîç Eyuboglu dîyar kerd ke cigêrayîşê zitî de şîyê vurnayîşê nameyê sey ‘cigêrayîşo hîra’ û vat, cigêrayîşê zitî binpaykerdişê heqan o û teşhîrkerdişê ci xeylêk girîng o.

 

Yew zî binpaykerdişê tewr zêde zîndan û demê destbendkerdişî de yeno ciwîyayîş, îşkenceyê cigêrayîşê zitî yo. Selahîyetdarî her çiqas nê înkar bikerê zî qalkerdişê kesê ke bi nê caardişî dir yenê rî bi rî her çî vejeno werte. Îqtîdar vera safîkerdişî îbareyê sey cigêrayîşê zitî qanûn de derbaz bîne sey ‘cigêrayîşo hîra’ vurna. No qerar bi îmzaya serekkomarê AKPyî de rojnamayê fermî de zî ca girewt.

 

Avûkata femînîste Merîç Eyuboglu derheqê babete de ajansê ma rê qisey kerf û vat, demê peyîn de çalakîya 8ê Adare û Unîversîteya Bogazîçî de cinî û LGBTÎyê ke ameyê destbendkerdiş, nê caardişî dir ameyê rî bi rî û vat: “Kesê ke nê caardişî vînenê, nêvajê mumkin nîyo ma bizanê. Ma eşkenê vajê ke demê peyîn de no Stenbol de zêde bîyo. Cigêrayîşê zitî girêdayê cinsî yo.”

 

Ganî bêro teşhîrkerdiş 

 

Merîçe dîyar kerd ke ganî kesê ke nê caardişî dir rî bi rî manenê qal bikerê û vat: “Cigêrayîşê zitî suc o. Kesê ke nê caardişî dir yenê rî bi rî, vernê de nêvanê yan zî nêzanê çî yo. Demo ke destpêk de nêvajê û dima ra gerre bikerê no zêde çîyêk îfade nêkeno. Semedê nê ganî bêro teşhîrkerdiş. Kesê ke rastê nê caardişî ameyê, sewîyeya dozgerî yan zî dadgehe de îfade nêkerdê, dosyaya înan taqîbnêkerdişî dir netîce bena.   Dosya şina Dadgeha Desturê bingehîn. Dadgehe dosya red kena. Semedê nê ganî nê binpaykerdişê heqan bêrê nuştiş. Eşnawitişê cigêrayîşê zitî bi qasê akerdişê dewa girîng o. Derbazbîyayîşê cigêrayîşê zitî yê raporan, hetê ke tarîx de sî ca bigîro xeylêk girîng o. Parlamenterê HDPyî Omer Gergerlîoglu na babete de xeylêk hewl da. Cigêrayîş verê ra esto, la nika hîna zêde bîyo.”

 

‘Bi cigêrayîşê zitî merdiman tecrîd kenê’

 

Merîçe tewr peyîn wina vat: “Kesê ke zîndan de yê înan rê cigêrayîşê zitî kenê. Ê kesî xora tepişteyê, gelo do çi serê înan de bibo. No hemverê huqûqî yo. Bi nê caardişî zî tecrîd yeno kerdiş. Tarlabaşi de cinîyêke rayîra şina, nasnamayê aye yeno perskerdiş û dima ra munaqaşa vejêno. Cinî yena destbendkerdiş û vera ke destbendkerdişê aye bikewo qeydan, cigêrayîşê zitî yeno kerdiş. Ma derheqê hîrê polîsan de gerre kerd. Ma dewa akerd. Netîceyê muhakemekerdişî de polîsêk bi qusur ame vînayîş. La cezayêke bê tesîr dayê. Îqtîdaro sîyasî vano, ‘çîyêk wina çin o, cigêrayîşê zitî çin o.’ Nika no îbare sey ‘cigêrayîşê hîra’ vurnayê. Tena name vurnayê. No nîno qebulkerdiş. Tena name vuryayo û çîyêk nêvuryayo.”