ANQARA - Nergîz Gornaz ya ÇHDyî dîyar kerd ke dimayê feshkerdişê Pêkerdişê Stenbolî êdî muracatê cinîyan nînê kerdiş, û vat: "Dadgehe  derheqê qerarê pawitişî de zî wina vana. ‘Verê kes qanûn ra xeberdar nêbi. Nika semedê her kes zano xeylêk dosyayê ma estê. Semedê nê ma nêeşkenê roniştişan akerê. Ma serê dosya de qeraran danê."

 

Dimayê feshkerdişê Pêkerdişê Stenbolî, têkoşînê cinîyan dewam keno. Semedê vindernayîşê qerarî bi seyan muracatî yenê kerdiş û netîce de redkerdişê qerarî de do cinî qerar berê Dadgeha Desturê Bingehîn (DDB).  Muracatê semedê pêkerdişê 18ê teşrîna peyêne de hetê Daniştay ra ame redkerdiş. Qerar de 8 endamî waştişê vindernayîşî red kerd û  5 heban zî bale antî serê têduştîyê cinsîyê komelî û hetê betalkerdişî de rayî xebitnayî.

 

Sereka Komîsyonê Cinîyan ê Şubeyê Komeleya Huqûqnasê Hemdem (ÇHD) ya Anqarî Nergîz Gornaz derheqê qerarê daniştayî û feshkerdişê pêkerdişî de qisey kerd.

 

Nergîze vat, redkerdişê waştişê yê hetê Daniştayî ra veto werte ke daniştay kam ci perspektîfî ra ewnîyeno û vat: "5 endamê muxalîfî bale ant serê têduştîya cinsî yê komelî. Tîya de hewcedarîyê semedê Pêkerdişê Stenbolî vejîyayo werte û no xeylêk girîng o. Ma avûkatê cinî yê têkoşînê cinsî danê vanê ke no ziwano ke huqûqî de ca girewto xeylêk bi hêvî yo."

 

'Fehmêk eksê huqûqî esto' 

 

Nergîze wina dewam kerd: "Qerarê  Daniştayî dayo goreyê huqûqî nîyo. 8 endamê Daniştayî waştişê vindernayîşî red kerdî. Bahaneyê nê   8 endaman û 5 endamê muxalîfî eksê yewbînan ê. Qeraran ancenê hetê bîn. Tirkîya de qanûn û qerarname goreyê hîn kesê dîyarkerde yeno dayîş û semedê nê zî kêfiyetêk pîl tîya de xo dano teber."

 

'Serê huqûqî de teda esto'

 

Nergîze dewam de wina vat: "Polîtîkayê hemverê cinî û LGBTjan, dimayê ziwanê dewlete çarçewaya heqê merdiman vejîyayo tedayê serê huqûq. Ziwanê sîyasî yê rojane serê qeraran de xeylêk bi tesîr o. Cinîyan dimayê qerarê Daniştayî verê xo dayî DDBî. Qerar DDByî zî do goreyê hawayê sîyasî bivuryo. Îhtîmalê ke qerarêk pozîtîf vejîyo zî esto. Wexto ke pmkerdişê Stenbolî caardiş de bi, salonê dadgehe de qalê pêkerdişî ameyîne kerdiş la dadgerî ci ra xeberdar nêbî. Dimayê pêkerdiş ame wedaritiş, ci ra xeberdar bî."

 

'Polîsî muracatan nêkenê qeydan' 

 

Nergîze tewr peyîn wina vat: "Cinî muracatê qerekolan kenê la polîsî hewl danê ke înan waştişê înan ra biaçarnê. Hewl danê gerreyê înan nêkerê qeydan. Semedê destpêkerdişê cipersayîşî îfadeyê cinî qîm keno la delîlê ‘somut’ yenê waştiş. Bi bahaneyê cîya cinîyan gerreyê înan rê açarnenê. Çi heyf  dadgehê keyeyî zî na babete de bahaneyê, ‘xeylêk kar esto' nîşan danê û vanê, semedê zêdebîyayîşê  dosyayan ma nêeşkenê roniştiş bikerê."