ANQARA - Avûkatanê Dewaya Kobanê mabêndayîşê roniştişê  7in ê dewa de Tahîr Elçî yad kerdî û vatî, ê wayîrê mîrasê Tahîr Elçî vejênê. 

 

Avûkatanê sîyasetmedarê Dewaya Kobanê yenê muhakemekerdiş, verê Kampûsê Zîndanê Sîncanî dewa yena kerdiş, Serekê Baroyê Amedî Tahîr Elçî ke 28ê Teşrîna Peyêne 2015 de qezaya Sûrê Amedî de ame kiştiş, yad kerdî. Avûkatan mabêndayîşê roniştişê 7in dewa de verê Eywana Roniştişê  Kampûsê Zîndanî eşkerayî wendî.

 

Serekê Baroyê Amedî Nahît Eren eşkerayî de qisey kerd û vat, Tahîr Elçî aktorêk girîng ê heqê merdiman bi û ê xo dabi têkoşînê heqê merdiman. Nahît Erenî dîyar kerd ke ê do wayîrê mîrasê Tahîr Elçî vejîyê û eke Elçî ewro bibayîne do semedê Dewaya Kobanê zî vengdayîşê beşdarbîyayîşî bikerdêne. Erenî vat, ê reyke bîn Elçî bi rêzdarî yad kenê.

 

Dima ra zî Serekê Baroyê Îzmîrî Ozkan Yucel, Serekê Baroyê Mêrdînî Îsmaîl Elîk, Serekê Baroyê Rihayî Welat Îzol, Serekê Baroyê Batmanî Erkan Şenses, Serekê Komeleya Huqûqnasê Hemdem yê Diyîn Umît Buyukdag, Hemsereka Pêroyî ya Komeleya Huqûqnasê Semedê Azadîye Îlknûr Alcan zî semedê vîrardişê Tahîr Elçî qisey kerd û dîyar kerdî ke ê do serê rêça  Elçî de têkoşînê xo yê edalet, heqê merdiman û huqûqî rayîra berê.

 

Eşkerayî bi berzkerdişê sloganê  “Tahîr Elçî bêmerg o” peynî bî.