Derya Ren

 

AMED - Semra Guzel a HDPyîje dîyar kerd ke îqtîdar HDPyî sey tehluke vîneno û pêwa pêro polîtîkayê tedayî û operasyonan şar kîşte HDPyî de yo.

 

Operasyonê qirkerdişê sîyasî yê hemverê HDPyî û pêameyîşanê ci de bi lez dewam keno. Her roje operasyonêk yeno rojeve û 8-9ê teşrîna peyêne de merkezê ci Amed û 5 bajaran sereştişê keyeyan ame kerdiş û 19 kesê ke amebî destbendkerdiş 14 hebî ameyî tepiştiş. Dima ra semedê kesê ke ameyê tepiştiş tewrbîyayîşê vîrardişê qirkerdişê Halepçeyî û serrgera qetilkerdişê Musa Anter bahane ame ramojnayîş. 25ê Teşrîna peyêne ra heta nika xeylêk  bajaran de bi operasyonan xeylêk kesî ameyî tepiştiş.

 

Parlamentera Amedî Semra Guzel derheqê dewaya padayîşê HDPyî, destbendkerdişê endamê HDPyî û welatiyan, tepiştiş, astengiyê vernîya cinîyan, polîtîkayê şerê taybetî û fezlekeyê parlamenterê HDPyî ameyê amadekerdiş de ercnayîş kerd.

 

‘HDP polîtîkayê îqtîdarî teşhîr keno’

 

Semra vat, operasyonê hemverê HDPyî darbeyê siyasî yo û îqtîdar HDP hemverê xo asteng vîneno û wina vat: “Ewro yewin partî çîyê ke zîhniyetê faşîst ê AKP-MHP keno, teşhîr keno û şarî rê neql keno, HDP yo. Semedo ke HDP yeno qebûlkerdiş zî îqtîdar dest bi operasyonan keno. HDP partîyêke rengîn ke mîyanê şarî de yo. Heto bîn ra anketê ke AKP-MHP kenê de zî dayeyê rayê HDPyî zêde vejênê. Demo ke nê vînenê dest bi hêrişan kenê. Bêguman aseno ke AKP kewto mîyanê tengî. Dewaya Kobanî ameye akerdiş.  Embazê ma yê hemserekan rê dewa ame akerdiş. Nika dewaya HDPyî rojeve de ya. No heyf û hêrsê weçînayîşê 7ê Hezîrana 2015î yo. O wext  AKP-MHPyî vatibi, ‘400 parlamenteran bidê ma nê karî biqedênê.’ Reyna vat, ‘Ma nêbê îqtîdar do koas awan bibo’. Kaosê serrê peyînan zî netîceyê nê yo.”

 

‘Şar dimayê operasyonan xo nêdano het’

 

Semra vat, 7ê Hezîrana 2015 ra heta nika bi qirkerdişê sîyasî dir rî bi rî yê û vat, HDP dimayê operasyonan reyna wareyan de bi û têkoşîn kerd. Semra wina dewam kerd: “Pêwa operasyonê ke ameyî kerdiş rayê HDPyî zêde bi. Ma hemverê operasyonan bêveng nêmanenê. Ma do têkoşînê xo dewam bikerê. Ne şar ne zî siyasetmedarî dimayê  operasyonan xo nêdayî kîşte. Ma hemverê operasyonan bêveng nêmanê. Ma do têkoşînê xo dewam bikerê. Tena şar ney, siyastmedarî zî bêveng nêmendî. Amed de demê peyîn de xeylêk operasyonî ameyî kerdiş. Dosyayê operasyonan muhtewayê înan veng o. Demo ke merdim sebeban ewnîyeno vîneno ke hukm destê înan de yo.”

 

‘Şar pêwa her çî kîşte ma de yo’

 

Semra dewam de wina vat: “Kesê ke ameyê destbendkerdiş persê eletewş pers kenê. Vanê ‘Çira tewrê bernameyê 8ê Adarê bî, kam rayîr da verê to? Çira Gulîstan Doku pers kenê?’ Cinî tewrê bernameyê sazgehê xo benê. La persê wina bêperwa  înan ra pers kenê. Qirkerdişê Halepçeyî ra vanê qirkerdişê ‘qaşo’. No heqerat o. Enfal de kurdî ameyî qetilkerdiş. Sebebê nê qirkerdişî dişminîyê hemverê kurdan bi. Pêwa pêro caardişan, şarê ma kîşte ma de yo. Îqtîdar zî zano operaysonê înan tu fêdeyê înan çin o.”

 

‘HDP sey tehluke vînenê’

 

Semra tewr peyîn wina vat: “Parlamenteran semedê tewrê bername û çalalakiyan bîyê fezleke ameyê amadekerdiş. Her vatişê muxalefetî hetê îqtîdarî ra suc teşkîl keno. Goreyê nê çîyê ke ê kenê legal, yê ke ma kenê îlegal ê. Ma siyasetê şarî kenê. Ma vervatoxê şarî yê. Qiseykerdişê vîrardişê qirkerdişê  Halepçeyî de yeno îlegalîzekerdiş. No hedîseyêk ameyo ciwîyayîş o. Ewro siyasetê HDPyî zî tehluke vînenê. Nê çîyê ke yenê ciwîyayîş netîceyê zîhniyetê tekperestî yo.”