COLEMÊRG - Dayîkê Aştîye yê Geverî reaksîon vera tecrîdê serê Rayberê PKKyî Abdullah Ocalanî dayî û vatî: "Waştişê ma oyo ke xeberêke Rayber ra bêro girewtiş. Êdî bes o, no zulmê AKPyî do heta key dewam bikero."

 

Tecrîdê serê Rayberê PKKyî Abdullah Ocalanî her ke şino giran beno. 8 mengî yo zanayîş ci ra nîno girewtiş û pêwa heme hewldayîşê avûkatan cewabêk pozîtîf nîno dayîş. Semedê girankerdişê tecrîdî polîtîkayê zere û teberî de sîyasetê şerî roj bi roj giran beno û sere de serê şarê kurdî û tesîr serê heme hetê komelî keno.

 

Endamê Meclîsê Dayîkê Aştîye yê Geverî reaksîyon vera tecrîdî dayî. Endama Dayîkê Aştîye Saadet Dogma û Gulê Polat derheqê babete de qisey kerdî û dîyar kerdî ke ganî pêvînayîş bêro kerdiş û Rayberê PKKyî Abdullah Ocalan azad bibo.

 

'Wa tecrîdê serê Rayberî wurzo'

 

Saadet Dogma dîyar kerd ke Dayîkê Aştîye bi serran o têkoşîn kenê û vat: "Bi aşman o xebere Rayberî ra nîna girewtiş. Ne keye ne zî avûkatî nêeşkenê şêrê pêvînayîş. Êdî bes o. No zulm do heta key dewam bikero? Ma heme aştî û çareserî wazenê. Wa pêvînayîş bêro kerdiş. Sey heme tepişteyan heqê ci zî esto. Wa tecrîd bêro wedaritiş û xebere ci ra bêro girewtiş."

 

'Waştişê ma pêvînayîşê bi keye û avûkatan dir o' 

 

Gulê Polat zî bale ant serê tecrîdê giran ê serê Rayberê PKKyî Abdullah Ocalanî û wina vat: "Tecrîd her ke şino giran beno. Ganî pêvînayîş bi keye û avûkatan dir bêro destpêkerdiş. Eke heq, huqûq û edalet bibayîne do pêvînayîşê bi Rayberî dir biameyîne kerdiş. La çi heyf bi serran o binê tecrîdî de yo. Ne keye vîneno ne zî qisey keno. Ma sey Dayîkê Aştîye wazenê ganî Rayberî ra xebere bêro girewtiş. Yewin waştişê ma hemine oyo ke tecrîd peynî bibo. Wa lezabez  pêvînayîş bêro kerdiş."