Melîke Aydin

 

ÎZMÎR - Cinîyan reaksîyon vera qedexeyê pêvînayîşî di cezayê dîsîplînî yê newe ke Rayberê PKKyî Abdullah Ocalanî rê ameyo birnayîş, ramojnayî û dîyar kerdî ke  îqtîdar semedo ke aştî nêwazeno, tecrîdê serê Rayberê PKKyî  Abdullah Ocalanî de dewam keno. Cinîyan sewbîna wina vatî, îqtîdaro ke şerî ra wey beno Îmrali ra terseno.

 

Rayberê PKKyî Abdullah Ocalan ke zîndanê Asayîşê Berzî yê Tîpê F yê Îmraliyî de binê şertê giranî yê tecrîdî de yeno tepiştiş, tepişteyê verê ci Omer Hayrî Konar, Hamîlî Yildirim û Veysî Aktaş zî eynî tecrîdî de yenê tepiştiş. Avûkatê Buroya Huqûqî yê Asrinî 22ê teşrîna peyêne de bi waştişê pêvînayîşî muracatê Dadgeriya Înfazî ya Bursayî kerdî. La bi îdiayê semedê di cezayê newe yê dîspîlînî ke Ocalanî rê ameyo birnayîş, destûr nêdayî ke pêvînayîş bêro kerdiş.

 

Hemverê qedexeyê pêvînayîşî cinîyan reaksîyonê xo ramojnayî.

 

‘Aştî înan rê feyde nêdano'

 

Vesîle Turan dîyar kerd ke bi tecrîdî dir tedayê hemverê kurdan dewam kenê û vat, kurdan xeylêk bedel dayê û hema zî danê. Vesîle wina vat: “Tutê ma hetê dewlete ra ameyî kiştiş, cezayê muebetî înan rê ame birnayîş. Waştişê tutanê ma cuyêka bi rûmet bî. Ma her tim aştî waşt. Ma azadîya serekê xo wazenê. Ma azadîya tutanê xo yê tepişteyan wazenê. Merdimê başî aştî wazenê. Ê aştî nêwazenê semedo ke feyde nêdano înan. La aştî semedê her kesî bi feyde ya. Tena semedê kurdan ney.  Tecawuzkar û dizdî zîndanan ra vejênê la tutê ma tepişte yê. Abdullah Ocalanî tecrît kenê û nêverdenê pêvînayîş bêro kerdiş."

 

'Îqtîdar aştî nêwazeno'

 

Cinîya bi nameyê Qeytan Gulmez zî wina vat: "Îqtîdar semedo ke aştî nêwazeno, berê Îmraliyî zî anêkeno. Destur nêdano pêvînayîş. Semedo ke înan ra tersenê. Wazenê krîz dewam bikero. Ma nêtersenê ê tersenê. La hewce bi tersî çin o. Ganî pêro tepişteyê sîyasî bêrê veradayîş. Aştî çîyêk xirab nîya. Çira nêwazenê pêvînayîş bêro kerdiş? Semedê aştî nêwazenê. Rayberê ma vera nêdanê. Semedo ke zulm dewam bikero vera nêdanê."

 

'Ganî êdî kurdî bêveng nêmanê'

 

Rizkiye Ozalp zî wina qal kerd: “Ganî ma vengê ke zîndanan ra berz beno bieşnawê. Ma azadî wazenê. Ma dewaya heqê xo kenê. Ma çîyêk zêde nêwazenê. Heqê ma çîyo ma ey wazenê. Wa dayîkî nêbermê. Ma vengdayîşê wareyê mîyanneteweyî kenê. Ma bajaranê xo yê ke qeyûm ameyo tayînkerdiş wazenê."