COLEMÊRG - Ozlem Zengîn ke Gever de kargehê aye esto wina vat: "Cinî biwazê eşkenê toxim açarnê baçxeyê vilan.” Ozleme bi bernameyê semedê îstîhdamê cinî, tutê astengdarî ke viraznena, hedef kena ke vernîya înan abikero.

 

Ozlem Zengîn Geverê Colemêrgî de ciwîyena û demêk verê kafeyêk akerd. Heme hacetê kafe bi eşteyan viraşt. Reyna kargerîyê xo de rojê wendişî  organîze kena û bi bernameyê cîya, hewl dana seba tutanê sendromê down û astengdaran çîyêk bikero. Beşêke  kafeye zî semedê cinîyê ke wazenê berardişê xo biroşê ca dayo ci. Ozleme wina vat: "Ma do hêzê xo nîşanê kesê ke vanê, ‘cinî nêeşkenê bi tena sereyê xo çîyêk bikerê' bidê."

 

Fikrê ‘Cinî nêeşkenê çîyêk bikerê veng vejîya'

 

Ozleme vat, bi paştdayîşê embazanê xo kargeh akerdo û hem semedê cinîyan û hem zî semedê tutê astengdaran bîyo ware û wina vat: "Cinî eşkenê toxim açarnê baxçeyê vilan. Hetê ekonomî de ganî cinî girêdayê kesî nêmanê û serê linganê xo de bimanê. No çîyêk zehmet nîyo, embazê ma yê cinî eşkenê bikerê. Ferz nîyo cayêk bêro akerdiş. Eşkenê keyeyê xo zî sey kargerî bixebitnê. Şima eşkenê odaya xo sey atolye bixebitnê. Ekonomîya xo awan bikerê."

 

'Ma hêzê cinîyan ramojnê'

 

Ozleme dewam de wina vat: "Mi bi butçeyêk qij nê ca akerd. Heta destê ma ra ame her çî ma bi destê xo viraşt. Ma refê xo bi xo viraşt. Ma waşt ke kede vejê vernî. Ma waşt ke ramojnê cinî bi hêz a. Ma bi eştişan hacetê xo viraştî. Plastîk xoza de hezar sere maneno. Xeylêk zirar danê. Ma plastîk kom kerd û boyax kerd. Şîşeyê camî zî wina yê. Ma nê zî kerdî aksesuar.”

 

'Merdim bi qerar bo eşkeno bikero'

 

Ozleme tewr peyîn wina vat: "Çîyêk zehmet nîyo. Wa cinî xo ra bawer bê temam o. Bawerî bibo eşkenê her çî bikerê. Eke cinî xo ra bawer bê, pabeyê pî, bira, mêrdeyî nêvinderê. Demo ke ma newe dest bi nê karî kerd, ma bi qerar bî. Eke merdim xo ra bawer bo gerek fek vera nêdo."