AMED - Merdima tepişteyan û nuştoxe Herdem Merwanî ke dimayê çalakîya grevê vêşanîye yê 3 rojî beşdarê "Nobeta Edaletî" ya merdimê tepişteyan bîye, vengdayîşê têkoşînî kerd û wina vat: “Ma keyeyê xo de zî binê tecrîdî de yê.”

Tecrîdo girankerde yê serê Rayberê PKKyî Abdullah Ocalan ke Zîndanê Asayîşê Berzî yê Tîpê Fyê Îmraliyî de yeno tepiştiş û heme tepişteyan dewam keno. Bi tecrîdê girêdayê zîndananê Vakur û Tirkîya  binpaykerdişê heqan zêde benê. Tepişteyê nêweşî nînê tedawîkerdiş. Bi raporê ATKyî tehliye yenê astengkerdiş. Tepişteyê ke cezaya înan tay menda, înfazê înan yeno veşayîş û tehlîyeyê înan yeno taloqkerdiş. 

 

Hemverê binpaykerdişê heqan û bêhuqûqîyê merdimê tepişteyan 16ê teşrîna peyêne de dest bi "Nobeta Edaletî" kerdî. Her roje keyeyê newe yê merdimê tepişteyan beşdarê nobeta ke bi 19 rojî yo dewam kena benê.

 

Nuştoxe Herdem Merwanî semedê waştişê veradayîşê pîyê xo Abdulhalim Kirtay (73) ke 29 serrî yo zîndan de yo û semedê bale bianco serê rewşa tepişteyê nêweşan 28ê teşrîna peyêne de dest bi çalakîya grevê vêşanîye kerd. Herdeme 30ê teşrîna peyêne de tewrê çalakîya nobete bî û peynîya grevê xo ard.

 

30 teşrîna peyêne de grev peynî kerd

 

Herdeme vat, pîyê ci Abdulhalim bi binpaykerdişê heqê  giranan dir rî bi rî mendo û wina vat: "Muracatê ma yê semedê tepişteyan bênetîce maneno, dest û lingê ma yenê girêdayîş. Semedo ke ez bale biancî serê rewşa tepişteyê nêweşan, mi 3 rojan çalakîya grevê vêşanîye kerd. Dimayê 30ê teşrîna peyîne de ez beşdarê çalakîya merdimê tepişteyan bîya, mi çalakîya xo peynî kerd. Ez zî sey pêro keyeyê tepişteyan, hem semedê pîyê xo, hem zî semedê heme tepişteyan hêviya 'edaletî' bî.”

 

‘Bi zanabîyayîş tepişteyan kişenê’

 

Herdeme vat ke xeylêk binpaykerdişê heqan yeno kerdiş û vat: “Ganî heme hetî vera binpaykerdişê heqan û nêheqîyan vengê xo berz bikerê. Coka ganî heme keyeyê tepişteyan beşdarê çalakîya nobete bibê. Wazenê ke kurdan çin bikerê, bikişê. Labelê no hende asan nîyo. Tepişteyê ke zîndanan de mirenê wa kes nêvajo ê bi xo merdê. Ê bi zaneyî yenê kiştiş. Bangin Muhammed zîndan de dinyaya xo bedilna labelê ma çend rojî derbaz bi hema newe musayî. Ma do destûr nêdê nê polîtîkayan."

 

‘Ganî kurdî bibê yew’

 

Herdeme dîyar kerd ke polîtîkayê tecrîdî yê vera Rayberê PKKyî Abdullah Ocalanî û tepişteyê bînan her ke şino tewr kûr beno û wina vat: "Tecrîd tesîrê xo serê heme komelî de keno. Ma keyeyê xo de binê tecrîdî de yê. Hemverê nê polîtîkayan xêrcê têkoşînî tu rayîr çin o. Ganî kurdî bibê yew. Dewlete hemverê tepişteyan suc kena. Bi têkoşînê ma tay averşîyayîş virazya. Labelê nê qîm nêkenê. Kam ci şar beno wa bibo, ganî vera nê zulmî bêveng nêmano. Ganî şarê kurdî bibê yew û bibê vengê tepişteyan. Kesêk nêeşkeno heqê ciwîyayîşî yê tepişteyan destê înan ra bigîro.”