ÎZMÎR - Sîyasetmedaran dîyar kerdî ke ê tecrîdê serê Rayberê PKKyî Abdullah Ocalanî qebul nêkenê û ganî berê Îmraliyî bêro akerdiş.

 

Serra 1999ine ra heta nika Rayberê PKKyî Abdullah Ocalan binê tecrîdê giran de yeno tepiştiş û pêwa muracatê avûkatan û keyeyî bi bahaneyê ‘cezaya dîsîplînî’ pêvînayîş yenê redkerdiş. Bi 8 mengî yo Abdullah Ocalan û tepişteyê bînî yê Îmraliyî Omer Hayrî Konar, Hamîlî Yildirim û Veysî Aktaş xebere nîna girewtiş.

 

Komîteyê Wezîran ê Konseyê Ewropayî (KW KE) 30ê teşrîna peyêne û 2yê kanûne de bajarê Strasbourgî yê Fransayî de kom bî. Kombîyayîş de muracatê Buroyê Huqûqî yê Asrin û Komeleya Huqûqnasan ê semedê Azadîye (OHD), Weqfê Cigêrayîşê Huqûq û Komelî (TOHAV), Komeleya Heqê Mirovan (ÎHD) û Weqfa Heqê Merdiman ê Tirkîya (TÎHV) ê DMMEyî de zî ameyî munaqeşekerdiş.

 

Komîteyî dimayê kombîyayîşî qerarê xo 3yê Kanûne de eşkera kerdî û derheqê hûmara tepişteyê  muebetî de zanayîş ame waştiş. Komîteyî selahîyetdarê Tirkîya ra waşt ke tewr erey heta êlule 2022yî xebere bidê înan.

 

Vervatoxa Kongreya Komelê Demokratîke (KCD) ya Îzmîrî Fevzîye Unal û endama Meclîsê Partîya Demokratîke ya Şaran (HDP) Ayfer Demîrel derheqê babete de ajansê ma rê qisey kerdî.

 

'Ekonomî semedê şerî yena xerckerdiş'

 

Fevzîye Unal dîyar kerd ke semedê şerî pareyêk pîl wedarnenê û Tirkîya de berardiş û edelet çin o û wina vat: “Welat de semedê çareserkerdişê problemê kurdî hewldayîş çin o. Hêrişê nîjadperestî, kiştişê cinîyan, nêcaardişê edeletî, nê hemine komel xira kerdo. Îqtîdar zî bi polîtîkayê şerî hewl dano serê lingan de vindero. Îqtîdar şerî rê butçe visneno û problemê û problemê komelî nimneno."

 

 'Wazenê Şarê Kurdî bitersênê' 

 

Fevzîye dîyar kerd ke îqtîdar şer û nêçareserî ra wey beno û sebebê astengkerdişê pêvînayîşê bi Rayberê PKKyî Abdullah Ocalanî dir zî tedayê hemverê Şarê Kurdî yo. Fevzîye dîyar kerd ke binpaykerdişê heqan û nêcaardişê qanûnan zî eynî wextî de semedê tersnayîşê kurdan yeno kerdiş."

 

'Semedo ke pêvînayîş bêrê kerdiş çi destê ma ra bêro ma kenê'

 

Ayfer Demîrel zî derheqê babete de ercnayîş kerd û wina vat: "No zî metodêk şerî yo. Heqê kesêk dest ra yeno girewtişî û no zî tercîhêk sîyasî yê îqtîdarî yo. Ma polîtîkayê tecrîdê serê Birêz Ocalanî qebûl nêkenê. Çi destê me ra bêro ma kenê. Îqtîdar hemverê şarî sîyasetê bêheqî keno û sernêkeweno. Tena serê Ocalanî de ney, serê her kesî de tecrîd esto. Kam vengê xo bikero teda kenê. La şar êdî vera nê bêveng nêmaneno.”

 

'Ganî pêvînayîş bêro kerdiş'

 

Ayfere tewr peyîn wina vat: "Tecrîdê serê Abdullah Ocalanî sucê merdimayî yo. No zî problemê komelî yo. Ganî metodê huqûqê unîversal û heqî bi ca bêrê. No problem pêro Tirkîya eleqeder keno. Ganî çareserîyêk bi ca bêro. Butçeyê şarî, şerî rê yeno visnayîş.  Her kes zî nê vîneno.”