ÎZMÎR - Îdarekarê HDPyî, huqûqnasan serdayîşê gorê Denîz Poyraz kerd û aye vîr ardî. 

 

Komîsyonê Heqê Merdiman û Huqûqî yê HDPyî bi minasebetê Hewteyê Heqê Merdiman de serdayîşê gorê Denîz Poyraza HDPyije ke Îzmîr de amebî kiştiş, kerdî. Gorê Denize Goristanê Kaynaklarê Bucayî de yo. Serdayîşê ameyo kerdiş de dayîk û pîyê Denîz Poyraze, aktîvîstê Tevgerê Cinîyan ê Azadan (TJA), Komîsyonê Huqûqê yê HDPyî, Înîsiyatîfê Dayîkê Aştîye ya Îzmîrî, Endamê Komeleya Paştdayîşê bi Keyeyê Tepişteyan û Hukumwerdoxan ê Egeyî (EGE-TUHAYDER) tewrê merasîmî bîn.

 

Hemserekê HDPyê Îzmîrî Abdulkadîr Baydur serdayîşê gorî de qisey kerd û dîyar kerd ke Denîz Poyraz şehîdê partîya înan a û ê soz danê Denîze do aştîye bi ca bîyarê û vîrardiş û xeyalê ci bica bîyarê.

 

Umît Dede zî dîyar kerd ke ê do hesab berpirsiyar û kiştoxê Denîz Poyraze ra biwazê û do wayîrê dewaya ci vejîyê.