Medya Uren

 

MÊRDÎN - Garîbeya ke serebûtê tecawuz û îşkenceyê ke zîndanan de benê îfşa kerd, bi sloganê “Şehît Nêmirenê” bi girseyî ameye definkerdiş. Gora aye bi cilê veyve ameyê pêşînayîş, dayîka aye bi lîlandinê xo re vat, "Kênaya mi veyva Kurdistanî ya." Garîbeye bi têkoşîno xo bî qêrînayîşê zîndanan û têkoşînê xo pey xo de verda.

 

Rexmê îşkence û qetlîaman moralê înan sey koyê Kurdistanî berz bi. Semedo ke ê xoverdayîşê ke dayê serberz ê. Înan zî zanayîne qêrînayîşê semedê azadî mîyanê çar dêsê zîndanan de bo zî berz bîne, nêameyîne bêvengkerdiş. Bi ruhê xoverdayîşî xo dir Garîbe Gezer û heme cangoriyê zîndanî bêmerg ê! Hemverê zulmî, hemverê şîdetî bî vengê cinîyan ê kurdan.

 

Garîbe Gezer, cinîya serewedarotox a Kerboranî şanê 10ê Kanûne roja Heqê Merdiman ê Dinya de dinyaya xo bedilnaye. Garîbeya ke hemverê şîdet û îstismarê zîndanan de bi çalakîyê ke kerdê de bî rojeva Kurdistanî, êdî mîyanê ma de nîya û qetilkerdişê aye ra vatî 'întîhar'. Raporê otopsî de netîceyê merdişê aye eşkera nêkerdî. Demê teslîmgirewtişê cenazeyê aye de heqaret cinîyan rê ame kerdiş û Mêrdîn de wesayîtê cenaze zî ci rê zêde ame vînayîş. Her çiqasî astengî vejîyabi zî bi seyan welatî Kerboran de cenaze pêşwazî kerdî. Bi sloganê, "Ey Şehîd! Gonîya To Erd de Nêmanena" dir şexsê Garîbe de soz dayî cangorîyê zîndanan. Cinîyan bi girseyî cewab dayî qetilkerdişê heme cinîyan ê kurdan. Cinîyê kurdî sere nêtewênayî û nêtewenê.

 

Bi serewedaritişê şerê xoserî dir hîkayeyê înan çeq dano... 

 

Bi serewedaritişê Rojawanê Kurdistanî dir Vakurê Kurdistanî û beşêk Başûrê Kurdistanî de zî serewedaritişê pîl ameyî kerdiş. 7ê teşrîna verêne 2014î de prosesê çalakîyê semedê serewedaritişê Kobanî, Vakur de ameyî destpêkerdiş de birayê Garîbe Gezer, Bîlal Gezer hetê guleyê kesê nênas ra ame qetilkerdiş. Bi nê serebûtî dir hîkayeyê keyeyî dest pêkeno. Birayê înan Mehmet Emîn zî semedê berpirsiyarê qetilkerdişê birayê xo Bîlal pers bikero, bi guleyê ke hetê polîsan ra yenê eştişî, felç maneno. Dimayê nê Garîbe kewena zîndan. Pey aye de zî waye aye Asya û birayê aye Haşim Gezer kewenê zîndan. Garîbe û Haşimî rê cezaya muhebetî yena dayîş. Derheqê 9 ferdê keyeyî de dewa yena akerdiş. Hîn înan ra dewam kenê û hîn zî dadgeha berzî de yê. Serpêameyê ke bi çalakîya serewedaritişê Kobanî dir çeq dayo bi nê rengî zî dewam keno...

 

Cezaya muebbetî yena dayîş

 

Garîbe Çeleyê serra 1990î de Kerboran de yena dinya. Heta wendegehê sereyîn ê 4ine wanena û teriknena. Tutîya xo ra zerrîwaştoxîya aye partî bîya û dimayê qetilkerdişê birayê xo wazena bi hawayêke fermî sîyasetê kurdî de ca bigîro. Roja ke birayê aye yeno qetilkerdiş hineyê Garîbe bîyo. aye dimayê nê îdarekerdişê Partîya Herêma Demokratîke (DBP) de ca gêna. Xeylêk çalakîyê ke semedê Rayberê PKKyî Abdullah Ocalanî, çalakîyê semedê Kobanî û şerê xoserî de ameyîne kerdiş de ca gêna. Dimayê nê Adara serra 2016 de yena destbendkerdiş û cezaya muebbetî semedê aye yeno dayîş.

 

Rexmê her çî moralê aye baş bi

 

Garîbe xeylêk zîndanan ra yena surgunkerdiş û tewr peyîn zî zîndanê Kandirayî de hucreyê yew kesî de manena. Aye zî sey heme tepişteyê sîyasî rastê binpêkerdişê heqan ê giran yena. Bi taybetî prosesê peyîn de rastê îşkence û tecawuzê gardîyanan yena. Yena virankerdiş û korîdorê zîndanî de yena kaşkerdiş. Aye kenê zereyê odaya bi sunger û bi bahaneyê zirar daya oda, reyna şîdet ci rê yeno kerdiş. Bi nê bahaneyî û semedê istismarê ci rê ameyo kerdiş, cezaya hucreyî yena dayîş. Hucre de zî sungerî ra zêdeyêr çîyêk nîno dayîş. Aye reyna bi israr serebûtê zîndanî qewimênê keye û siyasetmendaran rê neql kena. Tewr peyîn parlamenterê HDPyî Farûk Gergerlîoglu rê mektube şawena û keye rê zî bi rayîrê telefonî dir rewşa xo neql kena. Coka qiseykerdişê xo de ana ziwan ke moralê aye zaf baş o û zaf kêfweş a.

 

'TJA vengê mi eşnawit û êdî moralê mi baş o'

 

Tevgerê Cinîyan ê Azadan (TJA) 25ê Teşrîna Peyêne Roja Têkoşînê hemverê Şîdetê serê Cinîyan de startê çalakîyê xo serê xoverdayîşê Garîbe Gezer dabi destpêkerdiş. Dayîka Garîbe, Helîme Gezer tewrê startî bîbî hîsgêr bena û demêk serê hişê xo de şina. Teberê nê de zî TJAyî xeylêk bajaran de bi desan çalakî kerdî û bî vengê Garîbe. Waya Garîbe, Asya Gezer nê çalakiyan bi rayîrê telefonî Garîbe rê neql kena. Waya ci ma ra vana Garîbe serê nê babete de wina mi ra vat: "Bi eşnawitişê nê dir ez sereberz bîya. Eke TJAyî vengê mi eşnawito, êdî xemê mi nêmed. Ez bawer a ke hemrayê min ê cinî do bibê vengê mi û heme tepişteyan. Fek têkoşînê xo yê vera şîdet û binpaykerdişê heqan ra vera nêdana. Moralê mi xeylêk baş o. Ez zaf şad a. Pabeya ke cezaya min a hucreyî biqedîyo û ez pêvînayîşê akerdişî de şima xo verike bikerî."

 

'Vernîya leşkeran de sereyê ma nêtewênê' 

 

Garîbe 9ê Kanûne de, şanê Hewteyê Heqê Merdiman ê Dinya de dinyaya xo bedilnaye. Na rey bi xebera merdişê Garîbe dir veng berz bi. Bi seyan cinî semedê serewedaritişê Garîbe wayîr vejîyê kom bî. Merasîm de vengê slogan, tilîlî û lîlanî geş bîne. Dayîka Garîbe, Helîme Gezer bi zerrî ra vernîya girse de qisey kerd û vat: "Menalê! Vernîya leşkeran de sereyê ma netêwênê. Garîbe şima ya, ganî ma nênalê. Lazim o ma wayîrê waştişê aye vejîyê." Helîmeya ke bi israr vatêne, kênaya mi întîhar nêkena vatêne, heta peynî ez o pey dewaya aye de bî.

 

Hêrsê hemverê zulmî pîl bîne 

 

Serê gorê Garîbe de cilê veyvîtî ame ronayîş, bi deyîranê veyve serê milan de ameye wedaritiş. Dayîk, pî, wayê, birayê aye yê felç mendo mîyan de keyeyê ci vernîya ci de kom bi û destmalê aye şanayî. Dayîka aye lîlnayîşê xo de vatêne, “Şêra Kerboranî bî, bî veyva Kurdistanî” û lîrnayîne. Her lîlandiş de derûdor hîsgêr kerdêne û hêrsê înan ê hemverê zulmî pîl kerdêne.

 

Têkoşînê Garîbe Gezer ê hemverê zulmî pîl beno 

 

Vindertişê Garîbe Gezer û keyeyê aye hemverê şîdet, îstismar û zulmî bî cewabêk xurt. Nêtersayî û yê hemverê xo tersnayî. Têkoşînê Garîbe Gezer ê hemverê zulmî her pîl bîne û dewaya şarê kurdî ê bi serran bîne nimûne.