STENBOL - Tepişte Garîbe Gezer ke tecawuzî dir rî bi rî mende û îşkenceyo cînsî vîna, bişik cuya xo bedilna. Cinîyan reaksîyon mojna serebûtî ser o û vat: "Garîbe întîxar nêkerdo û bi destê neyarî ameya qetilkerdişî. Bi destê dewlete cinîyêke bîn ameye qetilkerdiş.” 

 

Tepişte Garîbe Gezer Zindanê Tîpê Fyî yê Humara Yewin ê Kandirayî de, hetê gardîyanan ra amebî tecawuzkerdene û îşkenceyo cînsî vînabî. Garîbe 9ê Çeleyî de, hucreya xo de biguman cuya xo bedilna bî. Mudurê Zindanî keyeyî gêra û malûmat da keyeyî. Kar û barê otopsî bêavûkatan, Sazgehê Tipê Edlî yê Kocaelîyî ra ame kerdiş. Cenazeya Garîbe 10ê Çeleyî de serê kiftê cinîyan de, seba bişawê şaristanê aye Kerboranî yê Mêrdînî berdîya Rasteyê Teyaran ê Neweyê Stenbolî. Rasteyê Teyareyê Mêrdînî de destûr nêda ambulanse û keyeyî bi fersendê xo cenazeya xo berd. 

 

Derheqê merdişê Garîbe de, binpaykerdişê selahîyetdaran hem hetê embazanê ci yê zîndanî û hem hetê avûkatan ra ame vatiş. Persê ke Garîbe ver bi mergî dir berd çi bî, hema pabeyê cewabî de yê û cinî hêrsê xo yê vera nê dewam kenê.

 

Serhildanêko gird yê cinîyan esto 

 

Vervatoxa DBPyî ya Stenbolî Dîlber Demîr malûmat da ke wexto peynî de zîndanan ra cenazeyî yenê vetiş û wina derg kerd: "Pelçiqnayîşkerdişê heqan, polîtîkayê bêcezaverdayîşî çi heyf ke embazêke ma ya bîne zî ma ra kerd. Ma zanê ke no întîxarêko normal nîyo. Sebebo ke a verbi întîxarî rê berdê çi bî? Ganî nê bêrê cigêrayîşkerdiş.

Embaza ma amebî tecawuzkerdene û îşkence vînabî.  Huqûqî ra tever û pelçiqnayîşkerdişê heqan benê sebebê zaf pelçiqnayîşkerdişan. Ma nêwazenê embazanê xo bikerin qurbanê nînan. Serewedaritişê Cinîyan gird o. Serewedaritişê ma gird o û ma do her tim mîyanê serewedaritişan de bi. Ma do bibê vengê embazanê xo yê tepişteyan." 

 

‘Wa Garîbe şehîda ma ya peynî bo’

 

Muhsîne Saçane zî ard ziwan: "Vanê Garîbe întîxar kerda, la embaza ma întîxar nêkerd, bi destê neyarî ameye kiştiş. Ma sere ra veng dadîyan û heme kesî kenê. Eke ma nêbin yew, ma do yew bi yew şêrin. Merdişê na embaza ma de verpersîyarîya ma heminan est o. Şehîde ê keyeyî tenî nîya, ê ma heminan a. Wa dadî wurzê serê lingan û wa na şehîde ya ma ya peynî bo." 

 

‘Hewl da ke vengê xo bido eşnawitişî’

 

Hemsereka Komeleya Hetkarîye ya Keyeyê Tepişteyan ê Marmarayî (MA-TUHAYDER) Esîn Çelîk zî eşkera kerd ke, vernîyê ke Garîbe cuya xo bibedelno zîndanî de derheqê pelçiqnayîşkerdişê heqan, îşkence û tecawuzê zîndanan de rayaumumî rê vengdayîşê hîsgêrî kerde û qiseyê xo wina domna: "Garîbe zîndanî de caardişê gardîyanan dir rî bi rî mende, ameye tecawuzkerdiş û tacîzkerdiş. Hewl dayêne vengê xo bido eşnawitişî. Ma zî sey Komaleya Keyeyê Tepişteyan hem zî sey rêxistinê cinîyan, hewl dayî vengê aye bidê eşnawitişî. La ma se kerd zî bes nêkerd. Garîbe Gezer seba psîkolojîyî peynîya cuya xo ard. Ma çiqas vajin peynîya cuya xo ard zî game bi game merdiş aye rê ame ferzkerdiş. Ganî îşkenceyo ke Garîbe rê ameyo kerdene, eşkera vejîyo meydan. Seba merdişê bînî nêrê cuyene ganî bi lezkî peynî pelçiqnayîşkerdişî bêro."