Sema Çaglak 

 

AMED - Cinîyan mojina ra ke, şexsê Garîbe Gezer de wehşetê duştê tepişteyan eşkera bîyo û vatî: "Ewro Zîndanan de bi hezaran sey Aysel Tuğluk û Mehmet Emin Ozkan zî estê ke nînê derman kerdiş. Ganî heme komelî duştê rewşa tepişteyan de hêsgir hereket bikerê." 

 

Welat de demêk dergo binpaykerdişê heqanê zîndanan, giranbîyayîşê rewşa tepişteyê nêweşî, betalkerdena înfazê tepişteyan û zaf meseleyê bînî ke zînadanan de yenê cuyayîş rojeva sereyîn de ya. Şarî rê vengdayîşê ke yeno kerdiş, Wezîrê Edaletî bêvengîya xo xirab nêkeno. Zîndanê Şakranî ya Humara 2yine ya Tîpê Tyî de tepişteyo nêweş ke rewşa weşîye ey giran bî Abdulrezzak Şuyur û tepişteyo Zîndanê Asayîşî ya Berzî yê Amedî Halîl Guneş ke nêweşo giran bi, hucreyê xo de merde ame vînayîş. Sewbîne Salîh Tuğrul, o ke Zîndanê Sêrtî ya Tîpê  Eyî de mendbî ke ferc bîbî û seba nêweşîya demanse ro ci peyda bîbî zî dinyaya bedilna. Rojê vîyarte de zî Garîbe Gezere Zîndanê Humara 1ine ya Tîpê Fyî ya Kandirayî de ameyîne tepiştiş û îşkenceyo cînsî ro aye amebî kerdiş, reyna hucreya xo de bi hawayêko bişik merde ameye vînayîş. Reaksîyonê duştê merdişê 4 tepişteyan mîyanê hewteyêk de dewam kenê. 

 

‘Şexsê Garîbe Gezer de wehşetê zîndan eşkara bi’

 

Aktivîsta TJAyî Hilal Ada, dîqet ant serê tecrîdî û eşkera kerd ke tecrîdê serê Rayberê PKKyî Abdullah Ocalanî de ewro heme zînadanan xo resnayo sewîyeya tewr corî. Hîlale, wina qisa kerd: "Na rewşa bîyaye de binpaykerdişê heqan her ke şino zafêr beno. Bêguman na babete de bêvengîyêk zî esta. Hem hetê muxalefetî de hem zî hetê dewlete de. Coka na babete de kerr û lal ê. La ganî muxalîf bizano ke, eke hêzê demokrasîye nêbê yew û şar çinê bo, ê do zî nêkoyê ser. Şexsê Garîbe Gezer de wehşetê  zîndanan eşkera bî. Dest dergkerdişê duştê tepişteyan û îşkenceyo duştê tepişteyan qet nîno qebûlkerdiş. Ganî şar na rewşe qebûl nêkero û vengê xo berz bikero." 

 

‘Ganî tu keyeyêk û şar na rewşe qebul nêkero’

 

Hîlale vat ke,  ganî pêro şar û keyeyê tepişteyan rewşa zîndanan dir bi hêsgirî nizdî bibê û wina peynî qiseyanê xo ard: "Mîyanê hewteyêk de 4 cenazeyî zîndanan ra ameyê vetiş. Na xemgînîyêka zaf pîl a. Nê prosesî de bêvengî û nêvînayîşê rewşe nîna qebulkerdiş. Na rewşa bîyaye de, lazim o ke ma têkoşîna xo tewr pîl bikerin û wayîrê tepişteyan vejîyin. Ganî amanc şikitişê tecrîdî bo û vetişê zîndanî bo. Ganî ma şexsê Garîbe Gezer de him rexnedayîşê xo bidê him zî bi têkoşînêka muştereke nê prosesî serkewtî bivîyarnin. Bi hezaran tepisteyê ma zîndanan de yê. Ganî keyeyêk û şar na rewşe qebûl nêkero.  Ganî kesêk nêvajo na qedera ma ya. Seba ke na qedera ma nîya. Yanê qirkerdişê sîyasî, fehmî û ekonomî ganî ma sey qedere qebûl nêkerê. Zorberdişê nê sîstemî bi têkoşînêko muşterekî mimkun o. Coka xusûsî vengê ma seba cinîyan ê ke cinî rol û misyonê xo kay bikerê û vernîyê nê qirkerdişî bigîrê." 

 

‘Tepişteyî terkê mergî yenê kerdiş’

 

Hemsereka HDPyî ya qezaya Yenîşehîrî ya Amedî Remzîye Sizici zî  eşkera kerd ke sîstem û zîhnîyetê dustê zîndanan xo ramojna yo û vat: “Îqtîdarê AKP û MHPyî çiqas şino tecrîdê serê tepişteyan û serê şarî zafêr keno. Şert û mercê zîndanan xora yeno zanayene û ma xeylêk rey bîyê şahidê na rewşe. Embazê ma yê nêweşî ke, na rewşa xirabe de yê îmkanê înan seba nêweşxane û girewtişê dermanî çinî yê. Tepişteyî nê şert û mercan de kewtê sewîyeyêk nêşenê tenî sereyê xo, kontrolê xo bikerê. Çiqas şino nêweşîyê înan giran bena û terkê merdişî yenê kerdiş. Mîyanê hewteyêk de 4 embazê ma dinyaya xo bedilnayî. Garîbe Gezer tenî bi sereyê xo, hucreye de ameyêne verdişî û waştbî vengê aye bêro eşnawitiş. Garîbe Gezer ameye kiştişî û verpersîyarê rewşe zî eşkerayê. Seba nê zî, o zilmo ke tepişteyan rê yeno kerdiş, ewro tenî nîno kerdene, bi serrano no zilm ro tepişteyan yeno kerdiş. Şahidê aye zî ganî yê. Verê çimanê ma de her çî beno."

 

‘Zîndanan de bi hezaran Aysel Tugluk û Mehmet Emîn Ozkanî estê’ 

 

Remzîye tewr peyîn wina vat: “Avûkatî rewşa tepişteyan kenê rojeve. Tepişteyê sey Aysel Tugluk, Mehmet Emîn Ozkan û bi hezaran tepişteyê bînî rewşa ke nêeşkenê zîndan de biciwîyê estê. Reyna amebi zanayîş ke Halîl Guneş semedo ke dermanê ci nêamebî dayîş dinyaya xo bedilna. Heqê tepişteyan ê bingeyîn yeno îhlalkerdiş. Tu welatî de rewşêka wina çin a. Dewlete bi xo qanûnanê xo binpay kena. Ewro zîndanan de bi hezaran Aysel Tuglukî estê, bi hezaran Mehmet Emîn Ozkan estê û nînê dermankerdiş. Embazê ma yê ke 28 serrî, 30 serrî zindanan de mendê û cezayê înan qedîyayê estê. La infazê înan yeno betalkerdiş. Na rewşêka bêhûquqî ya. Wa îqtîdar goreyê qanûnî têbigêro û tepişteyê nêweşî bêrê veradayîş. Sewbîna tepişteyê ke înfazê înan ameyo betalkerdiş bêrê veradayîş.”